Donald Trump tashmë ka hyrë në historinë amerikane si presidenti ndaj të cilit nisin dy herë procedurat për shkarkim.
Trump ka reaguar pas votimit të Dhomës së Përfaqësuesve të SHBA e cila e ka fajësuar zyrtarisht atë për “nxitje të kryengritjes” në trazirat e javës së kaluar në Capitol Hill.
Në një videomesazh në llogarinë e Shtëpisë së Bardhë në “Facebook”, pasi ato personale i janë bllokuar, Trump nuk e përmendi votimin dhe akuzat e ngritura ndaj tij.
Presidenti iu bëri thirrje qytetarëve që të shmangin aktet e dhunës, pasi ajo nuk përfaqëson vizionin e tij për amerikën dhe as të mbështetësve të tij.
“Dhuna bie ndesh me gjithçka përfaqëson lëvizja jonë. Asnjë mbështetës i vërtetë i imi nuk mund të pranonte kurrë dhunën politike, apo të mos respektonte flamurin amerikan dhe efektivët e forcave të zbatimit të ligjit”, tha Trump.
Presidenti gjithashtu komentoi mbi mbylljen e llogarive të tij në disa platforma, si “Facebook”, “Twitter” dhe “YouTube”, duke i quajtur veprimet e tyre një sulm të paprecedentë kundër fjalës së lirë.
