Moti i keq ka detyruar kapiteneritë në Durrës dhe Vlorë të pezullojnë lundrimin e anijeve deri ditën e diel. Në Vlorë sot tragetet me pasgjere të nisur nga Italia mbërritën me vonesë, ndërsa në Durrës erdhën në kohë.
Sakaq, në Durrës mësohet se era e fortë e mesditës ka ka mbajtur të mbërthyer në kalatat e portit detar të gjitha anijet e tonazhit të vogël e të mesëm. Edhe anijet e peshkimit kanë pezulluar lundrimet dhe gjuetinë në det deri të dielën. Deti shënon forcën 8 ballë.
Moti i keq ka përfshirë edhe qytetin e Vlorës. Që prej mbrëmjes së djeshme dhe në orët e paradites erërat e fuqishme kanë bërë që transporti detar të pezullojë lundrimin. Trageti i linjës Vlorë-Brindizi, i cili duhet të kishte mbërritur gjatë orëve të paradites në Portin e Vlorës për shkak të erës së fortë që kishte një shpejtësi prej 15-20 m/sek, nuk ka mbërritur, ndërkohë që deti shënon forcën 7 ballë.
Kjo ka bërë që edhe mjetet e tjera lundruese të mos dalin në det për të shmangur rrezikun. Sipas kapitenerisë së Portit të Vlorës, moti do jetë në këto kushte deri në orët e mesditës, kur parashikohet të mbërrijë edhe trageti nga Brindizi.
