Deputeti Fatmir Limaj ka thënë se nuk mban përgjegjësi për vrasjen e dy civilëve, Ramiz Hoxhës e Selman Binishit. Përgjegjësinë ia ka hedhur anëtarëve të Shtabit të UÇK-së. Për këto vrasje Limaj ka folur në Hagë.
Ai ka zbuluar po ashtu se kush e kishte plagosur Sabri Hamitin e kush e kishte vrarë Enver Malokun.
Fatmir Limaj, i ka bërë përgjegjës Shtabin e Përgjithshëm të UÇK-së për vrasjen e Ramiz Hoxhës dhe Selman Binishit.
Përgjegjësinë ia ka hedhur bazuar në një komunikatë të lëshuar nga Shtabi i Përgjithshëm i UÇK-së, që përbëhej prej këtyre ish-drejtuesve të lartë të UÇK-së.
Nuk ka një dokument apo dëshmi të saktë se nga kush përbëhej shtabi në atë kohë. Protagonistët kanë thënë se struktura kryesore e këtij shtabi përbëhej prej komandantit të përgjithshëm – Azem Syla, zëvendëskomandanti – Sokol Bashota, zëvendëskomandantit tjetër që ishte edhe zëdhënës – Jakup Krasniqi, drejtorit politik – Hashim Thaçi dhe Inspektorit të përgjithshëm – Rexhep Selimi.
Limaj ka thënë se nuk mbanë përgjegjësi për këto dy vrasje të kryera nga UÇK-ja, ndonëse ishin kryer në zonën që kontrollohej Brigada e tij, 121.
“Siç thashë, kur e ka marrë Shtabi i Përgjithshëm përsipër këtë, unë e kam konsideruar se nuk më takon kjo çështje, s’ka qenë përgjegjësi e imja sepse e dija që ne nuk kishim asnjë lidhje me ta”, ka thënë Limaj gjatë marrjes në pyetje në pyetje Gjykatën e Hagës në maj të vitit 2005 sa ishte i akuzuar për krime lufte të kryera në Llapushnik.
Limaj në këtë dëshmi ka folur edhe për plagosjen Sabri Hamitit dhe vrasjen e Enver Malokut.
I dyshuari për krime lufte kundër popullatës civile, ka thënë se viktimat e pushkatuara më 2 tetor 1998 nuk kanë qenë bashkëpunëtor të Serbisë. Megjithatë, gjatë dëshmisë së tij ka thënë se në Komunën e Malishevës nuk është vrarë kurrkush që ka hëngër ose pirë më serbët, por vetëm ata që kanë qenë bashkëpunëtorë të tyre.
Kryetari i Nismës për Kosovën, është marrë në pyetje të enjten në Prokurori si i dyshuar për krime lufte.
“Kemi qenë të ftuar nga Prokuroria për të sqaruar një rast nga lufta çlirimtare. Nga deklarimet e mija shpresoj që ta kem ndihmuar drejtësinë dhe shpresoj që fajtorët të dalin para drejtësisë”, ka thënë ai. /Klan Kosova
