Tofik Hyka shoqërohej nga shoferi i tij ditën kur u plagos rëndë në një atentat, në një kafene pranë stadiumit “Selman Stermasi”.
Shoferi i tij është edhe një nga njerëzit më të besuar që ai ka. E mban gjithnjë me vete dhe ai luan edhe rolin e truprojës.
Ai ka thënë në polici se ish –pronari i fabrikës së tullave në Vorë nuk ka pasur asnjëherë probleme.
Ka pranuar se bënte edhe rolin e truprojës, çka e vë në dyshim versionin e dhënë prej tij se ai s’ka pasur shqetësime.
Nëse do të ishte kështu, përse do të merrte dikë që ta ruante?
“Unë e shoqëroja kudo sa herë që ai vinte në Shqipëri. Jam një prej njerëzve të tij më të besuar, por nuk më ka folur ndonjëherë për probleme apo ndonjë rrezik serioz që mund t’i vinte nga dikush”, ka thënë në polici shoferi.
Përsa u përket atentatorëve, nuk ka dhënë ndonjë detaj të rëndësishëm për ngjarjen.
“Gjithçka ka ndodhur shumë shpejt, punë sekondash dhe nuk arrita të fiksoj gjë. Pashë vetëm kur u larguan me motor pasi qëlluan 4 herë”, ka vijuar ai dëshminë para grupit hetimor.
Emir i Tofik Hykës rezulton i përfshirë në disa ngjarje kriminale, vrasje zinxhir të ndodhura prej vitit 1995 në zonën e Shijakut.
Hetimet kanë zbuluar se ai ka pasur probleme edhe kohët e fundit, për shkak të pjesëmarrjes në aktivitetin e paligjshëm të dhënies dhe marrjes së parave me fajde.
