Dy mjekët e arrestuar për vdekjen e gruas dhe foshnjës së saj kanë deklaruar në polici se diagnoza ishte vështirë të përcaktohej. Sipas tyre as në dy spitalet e tjera, përkatësisht kardiologjia në QSUT dhe Sanatoriumi nuk kanë mundur të zbulojnë se Aida Çajkës i ishte çarë shpretka çka solli vdekjen e saj.
Mjekët e “Koço Glozhenit”, Helidon Klosi dhe Dritan Deçka kanë dhënë dëshminë e tyre në komisariatin nr.1 aty ku mbahen që prej mbrëmjes së të shtunës. Prokuroria lëshoi urdhër-arrest për ta pasi dyshohen për mjekim të pakujdesshëm.
Sipas mjekëve, pacientja Aida Çajka, e cila ishte në muajin e nëntë të shtatzënisë, është paraqitur në urgjencën e maternitetit “Koço Gliozheni” në orën 22:30. Ata janë shprehur se menjëherë pa asnjë lloj vonesë asaj i është dhënë ndihma e parë dhe është vizituar nga specialistët përkatës.
Në momentin që është vënë re se problemet e saj shëndetësore nuk lidheshin me shtatzëninë, në kushtet kur ajo vetë ka refuzuar një vizitë gjinekologjike, është transportuar me autoambulancë në QSUT për një vizitë më të specializuar.
Mjekët kanë pohuar se në momentin e parë kur është bërë vizita në maternitet, nuk janë konstatuar probleme të shtatzënisë, pasi uturusi dhe fetusi dukeshin në gjendje normale. Vetë pacientja u ka pohuar se shqetësimet e saj në formë shtrëngimesh i vinin nga ana e majtë.
Gjithashtu ka pasur të vjella, që i kanë bërë të dyshonin se, përveç problemeve kardiovaskulare, ajo mund të kishte edhe probleme të tensionit arterial.
Ndërsa janë shprehur se simptoma reale e saj ka qenë e vështirë për t’u përcaktuar, pasi as në dy spitale të tjera që është transportuar me autoambulancë, nuk i është konstatuar patologjia që ajo kishte.
