Deputeti i PS-së Alqi Bllako është marrë në pyetje nga SPAK në lidhje me aferën e inceneratorëve.
Bllako ka qenë Sekretar i Ministrisë së Mjedisit gjatë periudhës kur janë miratuar lejet për inceneratorët dhe firma e tij rezulton në një numër të madh dokumentesh, për të cilat duket se ka dhënë shpjegime në SPAK.
Kujtojmë se deputeti i PS, Bllako është akuzuar edhe nga opozita si pjesë e aferës së Inceneratorëve.
Jo më larg se dje, kreu i Partisë Demokratike, Lulzim Basha tha në Kuvend se babai i deputetit të PS, Alqi Bllako, merr një pagë mujore prej 10 milionë lekësh nga inceneratorët.
Basha u shpreh se babai i tij merr rrogë sa 5 deputetë bashkë, nga inceneratorët e paguar nga paratë e qytetarëve.
“Pagesat me paratë e shqiptarëve, për të ashtuquajturin incinerator i Tiranës, i cili në fakt nuk ekziston kanë filluar dy vjet para se të nisin punimet. Incenerimi nuk ka nisur, por prej 2018 qytetarët paguajnë 29 euro për ton. Në mes të pandemisë kur e gjithë bota kishte ndaluar fluturimet, këta kanë faturuar 850 mijë euro fluturime dhe udhëtime. Skemë e pastër e pastrimit të parave. 10 milionë lekë në muaj është rroga e babait të njërit prej deputetëve këtu në këtë sallë, sa 5 deputetë bashkë merr babai i njërit prej jush nga inceneratori i paguar me paratë e qytetarëve, Alqi Bllakos”-tha Basha.
Përveç Bllakos, në SPAK ishte edhe kryebashkiaku i Fierit Armando Subashi, i cili është pyetur në lidhje me rolin e tij në marrëveshjen për inceneratorin e ndërtuar në këtë qytet./Opinion.al
