Partia Demokratike ka reaguar lidhur me deklaratën e djeshme të Presidentit Bajram Begaj i cili iu përgjigj deklaratave të ministrit britanik të Imigracionit, Robert Jenrick, që u shpreh me tone të ashpra dhe iu bëri thirrje oficerëve të emigracionit të kapnin çdo shqiptar dhe t’i dërgonin drejt Tiranës.
Në një deklaraët për mediat nga selia blu, zëdhënësja e PD, Floriana Garo u shpreh se presidenti po flet me gjuhën e kryeministrit Rama.
Sipas Garos, motoja “Fajin e ka Anglia” nuk dëshmon gjë tjetër veçse papërgjegjshmërisë dhe së politikave të brendshme.
“Kur dëgjon presidentin e Republikës të huazojë gjuhën e gjatë të kryeministrit apo të Xhaçkës së tij, dhe të marrë shenjë qeverinë e Madhërisë së Tij, kupton se shteti ka rënë në duar të pasigurta, ashtu si shqiptarët që ikin janë në kthetrat e sekserëve të emigracionit të paligjshëm, nëpër kanalin e La Manshit.
Identifikimi vullnetar i Presidentit me kryeministrin, edhe në gjuhën e marrëdhënieve ndërkombëtare, një fushë ku ky i fundit është tashmë i diskredituar, dhe i ka sjellë kosto vendit, dëshmon se ndarja e pushteteve në Shqipëri është një koncept i huaj dhe Begaj e Rama i dinë vetëm emrin.
Presidenti si emblema e supozuar e unitetit kombëtar, duhet t’i thërrasë mendjes së pari, dhe së dyti të thërrasë Këshillin e Sigurisë, sepse emigracioni biblik, shpopullimi kataklizmik, nuk janë punë deklaratash, por emergjencë kombëtare.
Lufta e deklaratave dhe motoja “Fajin e ka Anglia” nuk dëshmon gjë tjetër veçse papërgjegjshmërinë dhe varfërinë e mendjeve dhe politikave të brendshme, ta cilat mbulohen me pseudo ngjarje në marrëdhëniet me jashtë”-tha Garo.
Presidenti u shpreh dje nga Lezha ku bëri homazhe për 555-vjetorin e vdekjes së Skënderbeut, se zyrtarë të lartë duan të zgjidhin dëshpërimin e tyre ditor duke iu rënë në qafë shqiptarëve, duke lënë të nënkuptuar se kjo ishte një përgjigje për deklaratat e ministrit britanik.
