Presidenti Ilir Meta ka reaguar në lidhje me deklaratën e Koordinatorit për Zgjerimin, Michael Gahler, i cili i bëri thirrje qeverisë shqiptare të mos kritikonte Bashkimin Evropian, por të fokusohej te plotësimi i kushteve për integrimin e vendit.
Përmes një postimi në “Facebook”, Meta përshëndet deklaratën e Gahler, ndërsa shprehet se e garanton Koordinatorit për Zgjerimin se zgjedhjet e 25 prillit 2021 do t’i japin fund injorimit të kushteve dhe plotësimit të standardeve për integrimin, duke e rivendosur vendin drejt Bashkimit Europian.
LEXO EDHE: Gahler: Rama të mos përgojojë BE, të plotësojë kushtet për anëtarësim
Reagimi
E përshëndes vëmendjen e pandërprerë të Partive Popullore Europiane dhe thirrjet e përsëritura të miqve të sinqertë europianë, të cilët mezi presin çeljen e negociatave për Shqipërinë.
I garantoj se mbi 99% e popullit shqiptar, mezi e pret hapjen e negociatave dhe se zgjedhjet e 25 prillit 2021 do t’i japin fund injorimit të kushteve dhe plotësimit të standardeve për integrimin, duke e rivendosur vendin, plot energji të reja, drejt Bashkimit Europian./ Opinion.al
