Kryetari i grupit Parlamentar të PS, Gramoz Ruçi duke folur nga seanca e parlamentit gjatë raundit të tretë dhe të dështuar për zgjedhjen e Presidentit i dha një ultimatum Ilir Metës: Zgjedhim Presidentin e vendit bashkarisht ose shkojmë në zgjedhje të parakohshme. Nuk ka më kohë për dialog dhe negociata me opozitën, theksoi Ruçi. Ai i kujtoi Metës edhe faktin se PS i ka 71 vota pa LSI-në. Në fund Meta nuk bëri asnjë koment por njoftoi se do të mblidhet Konferenca e Kryetarëve.
Fjala e plotë e Gramoz Ruçit në Parlament
Z. kryetar i Kuvendit, sigurisht më vjen keq për ato ç’ka do të them më poshtë… por si kryetar i grupit të PS edhe në respekt të grupit dhe në respekt të popullit shqiptar do të flas troç.
Ne jemi dakortësuar me filozofinë e lutjes ndaj PD-së që keni zgjedhur ju… (LSI).
Sot dogjëm dhe raundin e tretë edhe pse i kemi votat për ta zgjidhur që në raundin e parë. Dhamë të gjithë kohën e nevojshme që kundërshtarët tanë politikë të na jepnin një kandidaturë.
Ju (i drejtohet Metës) na kërkuat para një jave, kryetarit të PS dhe mua, që ti drejtoheshit me një letër PPE-së, të cilët me thënë të drejtën, në përvojën time, asnjëherë nuk kanë qenë dashamirës me socialistët. Ne ramë dakort dhe ju i dërguat ftesën atyre, të cilët, çuan një zotëri tepër të respektuar.
Në takim ai zotëri u prezantua me status të trefishtë, si Zv.President i PPE-së, si kryetar i komisionit të jashtëm të PE, dhe u prezantua edhe si përfaqësues i zyrës së kancelares gjermane.
Pra me pak fjalë, që vij këtu i mandatuar nga 3 institucione. Ai erdhi së bashku me një zotëri tjetër, u takuam dhe ishim bashkë zoti kryetar dhe ju jeni dëshmitar, që ne si përfaqësues të PS-së ramë dakort me platformën e tyre.
Por si duket ne socialistëve këta ndërkombëtarët na kanë marrë dorën… Na kërkuan të thellohemi jashtë çdo logjike normale, kushtetuese, demokratike…. Ne sigurisht që i duam dhe i respektojmë Gjermaninë dhe përfaqësuesit e saj, sepse ne shqiptarët e kemi Gjermaninë si fener ndriçues në Europë. Por ajo që na çudit neve është që kur vijnë këtu bëhen si ne dhe na kërkojnë gjëra që askush nuk i çon ndërmend.
Na kërkuan të shtyjmë zgjedhjet, që të prekim qeverinë, vetëm për të pushuar çadrën, që do edhe penalltinë, edhe topin, por edhe portën bosh.
Ju zoti kryetar i Kuvendit u treguat shumë i lumtur edhe pse këto kërkesa ishin për mua absurde. Kryetari i PS nuk tha as po e as jo por u dha të kuptohet që është i gatshëm të diskutojë me kushtin që të vijnë të votojnë Vettingun. Pas disa minutash, morëm vesh që zoti Basha ishte larguar.
Ju zoti kryetar keni 4 vite që drejtoni kuvendin dhe Saliut i keni dhënë kohë për të folur, ka folur 3 herë më shumë se Kryeministri.
Ka kufij kjo punë zoti kryetar, 1 milion njerëz që na kanë votuar për ta qeverisur këtë vend po vazhdojnë të shikojnë sesi na merr peng një çadër që e ka hallin tek Vettingu dhe drejtësia.
Përgjigja ime për këtë është një dhe e vetme, dialogu ka mbaruar. Ne duhet të zgjedhim Presidentin e vendit!!
Ne socialistët i kemi bërë llogaritë tona, i kemi patur dhe po të duam, i kemi 71 vota edhe pa LSI-në, por unë shpresoj që të mos të na detyroni dhe të mos marrim përsipër të shkelim mbi moralin e kësaj force politike.
PS nuk dëshiron të zgjedhë me forcën e numrave Presidentin, sepse ne kemi gjykuar se do të zgjedhim presindetin dhe jo atë të fondacionit “Qemal Stafa”.
Ju takon juve që jeni vendosur si ndërmjetës zoti kryetar, dhe ka kohë dhe po ta them troç, keni anuar nga pala tjetër dhe mirë keni bërë. Prandaj unë do të doja që t’ju kërkoja që edhe ju të reflektoni.
Unë do të kërkoja që të mbledhësh menjëherë Konferencën e Kryetarëve: Ose të zgjedhim Presidentin bashkë ose të shkojmë në zgjedhje të parakohshme pas 45 ditësh sipas Kushtetutës.
Ky është propozimi ynë, por ju përsëri mund të mbani një tryezë politike siç e mbajtët dje…
Kërkoj (sipas rregullores) që nesër të kemi seancë për të zgjedhur Presidentin e Republikës ose në të kundërt shpërbëhet parlamenti dhe shkojmë në zgjedhje të parakohshme.
