Studentët vijojnë ngujimin e tyre nëpër auditore të fakulteve dhe sot, protestës i janë bashkuar edhe studentë të tjerë që janë ngujuar në universitete të tjera, Dekanati i Fakultetit te Historise dhe Filologjise kanë dalë me një deklaratë.
Pas një mbledhjeje për situatën më të fundit të krijuar, dekanati dhe pegagogët janë shprehur në mbështetje të plotë të protestës së studenteve dhe të kërkesave të tyre të ligjshme, si dhe kanë dënuar me forcë dhunimin që u bëhet atyre nga Policia.
Deklaratë
Pas njohjes me diskutimet e zhvilluara në të gjitha departamentet, Dekanati i FHF-se deklaron se pedagogët:
♦ rikonfirmojnë mbështetjen e protestës së studentëve dhe të kërkesave të tyre të ligjshme;
♦ dënojnë ndërhyrjen e organeve të rendit në mjediset universitare dhe dhunimin e studentëve prej tyre;
♦ janë kundër çdolloj nderhyrje dhe presioni, qe synon deformimin e vullnetit të lirë të studentëve;
♦ kërkojnë ndalimin e fushatës denigruese dhe të përbaltjes masive të trupës akademike universitare nga aktorë politikë dhe qeveritare, që synon intimidimin e mendimit të lirë;
♦ propozojnë ngritjen e një strukture me pjesemarrjen e të gjithë aktorëve për trajtimin dhe adresimin e problematikave që po kalojnë IAL-të publike në RSH;
♦ rikonfirmojnë kërkesën për rishikimin thelbësor të Ligjit të Arsimit të Lartë në RSH;
♦ i sigurojnë studentët për gatishmërinë e tyre në angazhimin për realizimin e objektivave të vitit akademik në vijim.
Dekani
Prof.dr. Sabri LAÇI
