Prej më se dy orësh debatohet në Komisionin e Ekonomisë projekti i qeverisë për aeroportin e Vlorës. Aty janë dy ministrat Ahmetaj dhe Gjiknuri të cilët kërkojnë të miratojnë një ligj që i hap rrugë qeverisë të negociojë me një konsorcium turk për ndërtimin e aeroportit të ri, por opozita mbetet skeptike.
Deputetja e PD-së, Jorida Tabaku ka kërkuar të shohë studimin e fizibilitetit, ndërsa ministri Gjiknuri vijoi t’i qëndronte idesë se nuk mund të japë detaje mbi ofertën pasi cenohen bisedimet. Ai tha se në studimin e fizibilitetit janë dhe këto detaje.
“Këto do të jenë pjesë e negociatave dhe ju do të keni fatin e mirë, që kur të vijë kontrata të shikoni elementët e tarifimit dhe modelit ekonomik dhe tarifat për përdoruesit. Na lini që të shkojmë aty. Ato që kemi shkruar dhe nga të dhënat paraparake propozimet janë shumë më të lira se nga Rinasi”, tha Gjiknuri.
“Qeveria nuk ka asnjë copë letër që duhet një aeroport në këtë zonë?! Nuk ka Ministria studim të vetin?!”, replikoi Tabaku.
“Është mbushur Shqipëria në çdo rrëke uji me hidrocentrale, me studime të vetë operatorëve dhe asnjëherë nuk është kërkuar kjo gjë, ndërsa për një aeroport e kërkoni”, iu përgjigj Braçe-Tabakut.
Nga ana tjetër, ish-ministri i Transporteve, sot deputet i LSI, Edmond Haxhinasto tha se gara duhet të jetë e hapur, pra të ketë tender ndërkombëtar.
“Unë kam vlerësim pozitiv sepse besoj se Shqipëria ka nevojë për aeroporte, madje ky proces ka filluar prej kohësh nga qeveria shqiptare. Ajo që më shqetëson është formula që do aplikohet për investimin në Shqipëri ndaj kam disa pyetje për ministrat: Ne kemi dështuar me kompaninë kineze për rrugën e Arbrit dhe theksoj se e njëjta procedurë u ndoq, i kërkuam Kuvendit të na japë leje të negociojmë, por oferta që u paraqit nuk ishte me interes publik. Po kështu më shqetëson fakti se nuk ka një studim fizibiliteti dhe më kryesorja: Pse nuk ka tender të hapur ndërkombëtar?”- u shpreh Haxhinasto.
/Opinion.al
