De Biazi kërkon të “hajë” edhe kokën e trajnerit të Danimarkës

Xhani De Biazi u ka kujtuar danezëve se Shqipëria nuk ka humbur asnjëherë deri tani. Në konferencën e djeshme për shtyp, ai është parë tepër serioz dhe shumë i prerë në përgjigjet që ka dhënë. Trajneri i Kombëtares, ka vlerësuar maksimalisht punën e homologut Olsen, por ka thënë se skuadra e tij do të luajë me zemër për të mos dalë pa pikë nga “Parken Stadium” sot në mbrëmje. Nëse Shqipëria fiton ose barazon sot me Danimarkën, kjo mund të jetë ndeshja e fundit për trajnerin vendës, Olsen. Në rast shkarkimi, ky do të ishte një rekord për “Guiness” sa i përket De Biazit, i cili mund t’i “hante” kokën edhe një trajneri tjetër të këtij grupi. Deri tani, janë shkarkuar trajnerët e Portugalisë, Serbisë dhe Armenisë pas humbjeve që u ka shkaktuar Shqipëria.