Presidenti Meta është shprehur se do t’i drejtohej Strasburgut në rast se Kushtetuesja vendos që t’i shpallë si të ligjshme zgjedhjet e 30 qershorit të vitit 2019.
“Do ta çoja në Gjykatën e Strasburgut, çështjen e zgjedhjeve vendore nëse Gjykata Kushtetuese, do i shpallte si kushtetuese. Unë do zbatoja vendimin e Gjykatës si President, por unë prisja që Gjykata Kushtetuese, t’i shpallte antikushtetuese zgjedhjet e 30 qershorit 2019 nisur dhe nga raporti OSBE/ODIHR, si dhe mos publikimi i dekretit të Presidentit, për datën e zgjedhjeve në Fletoren Zyrtare. Unë si President, këtë vendim kam pritur, që zgjedhjet më pas të bëheshin në të gjithë vendin. Ndaj dhe une tani kam nisur nje procedure dhe jam i vendosur per te ecur perpara ne kete process”, tha Meta.
Më tej, gjatë një interviste në Syri TV, Meta tha se shpallja e datës për zgjedhjet e pjesshme nuk ka lidhje me Lulzim Bashën. “Nëse partitë nuk janë gati për të hyrë në zgjedhje, atëherë le të dalin kandidatë të pavarur”, tha ndër të tjera Presidenti.
“Shpallja e datës së pjesshme të zgjedhjeve vendore, nuk ka lidhje me z.Basha dhe as me ndonjë parti tjetër. Nëse partitë nuk janë gati për të hyrë në zgjedhje, atëherë le të dalin kandidatë të pavarur dhe çdo qytetar që do të kandidojë”, u shpreh Meta./Opinion.al
