Mungesën e tij sot në kuvend, Sali Berisha e ka lidhur në mënyrë të drejtpërdrejtë me kontradiktat e tij të hapura me presidentin Erdogan.
Edhe pse kishte pohuar që të hënën do të shkonte në kuvend, Berisha mungoi në seancën e parë të vitit 2022, ndërsa pohoi gjatë një interviste në Vizion Plus, se në kohën që ishte Kryeministër, ai nuk ka pranuar të votojë në OKB rezolutat që lidheshin me çështjen e Palestinës.
“Mungova sot sepse gjykova që nuk duhet të isha i pranishëm në fjalën në Parlament të presidentit të Turqisë, Erdogan. Unë jam njeri që respektoj shumë Turqinë dhe kombin turk, por unë kam patur kontradikta të hapura me presidentin Erdogan në vitet e fundit të qeverisjes nga unë, ku nuk kam pranuar të ndjek apo të votojmë në OKB rezolta që binin në kundërshtim, në vlerësimin tim, me qëndrimet që mbanin SHBA dhe vendet e mëdha për çështjen e Palestinës.
Shqipëria është nga ato të pakta vende që ka një ambasadë të Palestinës prej vitesh, por asnjëherë nuk u vendos në diskutim prania e saj në Tiranë. Rezoluta me të cilin u ndava me Erdogan ishte një përpjekje për të përjashtuar rolin e SHBA në zgjidhjen e krizës në Lindjen e Mesme. Ishte përpjekje për ta salduar edhe më tej atë krizë” – tha Berisha./Opinion.al
