Teksa Serbia ka nisur zyrtarisht sot vaksinimin kundër COVID-19, Shqipëria ende nuk ka siguruar dozat të vaksinës, ndërsa nuk ka as dhe një datë të afërt për nisjen e vaksinimit.
Por, pavarësisht situatës kryeministri Edi Rama është shprehet se qeveria po punon çdo ditë për sigurimin e dozave të vaksinës, ndërsa shton se gjërat janë ndryshe nga ato që transmetohen në media.
“Tjetër gjë është ajo çfarë thuhet e komentohet nëpër media dhe tjetër është realiteti i situatës me vaksinën”.-tha Rama.
Kreu i qeverisë theksoi se “shifra e vaksinave që po marrin vendet e mëdha krahasuar me pritshmëritë e tyre janë jashtëzakonisht të ulëta”, teksa shtoi se vendi ynë do të nisë vaksinimin në fillim të vitit të ardhshëm.
“Problemi është që kërkesa është shumë më e lartë sesa oferta dhe sasia e prodhimit është ku e ku më e vogël sesa nevoja. Ky është një problem i madh në fazën e parë. E dyta, në SHBA është vendosur ndalimi i eksportit të çdo sasie dhe sasinë kryesore të Pfizer e kanë SHBA. Nuk del asnjë dozë për vendet e tjera nga SHBA. E treta, jemi në komunikim me të treja kompanitë (Pfizer, Astrazeneca dhe Moderna) dhe me shtete mike, pavarësisht se BE ka marrë vendim për Ballkanin se do të jepen teprica. Në fillim të vitit të ardhshëm do të nisim të vaksinojmë, sot nuk dua të jap më shumë të dhëna sepse nuk janë të konfirmuara 100%. Mund të jetë më shpejt, por mund të jetë edhe pak më vonë. Të marrësh vaksinën është si radhët e qumështit të kohës së dikurshme. Në vend të banorëve që vinin shishen në radhë, sot janë shtetet”, tha Rama.
Kujtojmë se Serbia është bërë vendi i parë në Ballkan që ka nisur vaksinimin kundër COVID-19/ Opinion.al
