“Çfarë tha Dumani për hetimin e politikanëve” është tema që po diskutohet në emisionin “Opinion” duke iu referuar raportimeve të bëra sot në Parlament nga kreu i Prokurorisë së Posaçme.
Analisti Neritan Sejamini tha se priste më shumë përfshirje nga deputetët e opozitës, duke thënë se gjatë kohës së raportimit nga Dumani, ata nuk u ndalën në çështjet institucionale dhe ecurinë e Reformës në Drejtësi, por bën pyetje që lidhen me hetimet.
“U habita që pothuajse të gjitha pyetjet ishin për hetimet. SPAK ka një sërë problemesh dhe një Kuvend me këtë duhet të merret, me anën institucionale. Sot aty është humbur një mundësi: si ka ecur Reforma në Drejtësi, çfarë vështirësish ka. Një problem i jashtëzakonshëm është fakti që reforma në drejtësi kaloi nga një ekstrem në tjetrin, nga momenti kur prokurori ishte shefi i çdo prokurori, në momentin kur çdo prokuror është shefi i vetes dhe i askujt tjetër. Kjo ka fragmentuar hetimet, ka sjellë probleme të caktuara dhe mbi të gjitha ka krijuar standarde të shumëfishta. Ky problem nuk doli askund!”, tha Sejamini.
Ndërkohë, gazetari Anri Bala komentoi deklaratën e Dumanit, që e konsideroi ish-zëvendëskryeministrin Arben Ahmetaj ende njeri të kërkuar nga drejtësia, e megjithatë e ftoi publikisht që nëse donte të kthehej në bashkëpunëtor të drejtësisë, ishte i mirëpritur.
“Dumani thotë është i mirëpritur. Problemi është se Dumani, në raport me bashkëpunëtorët e dështuar të drejtësisë, ata duhet ta konsiderojnë veten të fajshëm njëherë, kur ai deklaron se ai është i pafajshëm”, tha Bala./ Opinion.al
