Vijon të përkeqësohet situata e pandemisë COVID-19 në Itali. Autoritetet shëndetësore bëjnë me dije se kanë rezultuar pozitivë 37242 persona në 24 orët e fundit.
Po në 24 orët e fundit është shënuar rritje edhe në numrin e viktimave. Sot vendi fqinj raportoi 699 të vdekur si pasojë e COVID-19, nga 653 të 24 orëve më parë.
Sa i takon gjendjes në spitale, 3748 pacientë, ( 36 më shumë se dje) janë duke marrë kujdes shëndetësor në reanimacion.
Lombardia vijon të mbetet rajoni më i prekur nga pandemia me 9221 raste dhe 175 viktima vetëm gjatë ditës së sotme. Shifrat mbeten ende shumë të larta, edhe pse 4 rajone kanë ulur treguesin e infeksionit dhe ndodhen jashtë fazës alarmante. Bëhet fjalë për rajone si Sardenja, Molise, Liguria dhe vetë Lacio, ku ndodhet edhe kryeqyteti italian, Roma./ Opinion.al
