Sipërmarrësi dhe ish-deputeti i Partisë Demokratike Agron Shehaj, ndërsa analizoi situatën ekonomike të krijuar në vend për shkak të koronavirusit, tha se të paktën gjysma e personave të punësuar në sektorin privat, rrezikojnë të pushohen nga puna.
“Në të gjithë botën po ndihmohet biznesi për të përballuar koston e pagave. Shqipëria është i vetmi vend ku kjo kosto bie mbi sipërmarrësit. Qeveria thotë: unë nuk kam ndër mend t’i paguaj sipërmarrësit. Mos harrojmë se në Shqipëri ka besoj 500 mijë të punësuar në sektorin privat. Nga këta sigurisht më shumë se gjysma nuk po punojnë. Nëse qeveria nuk merr përsipër të ndihmojë këto biznese, këto biznese sigurisht do mbyllen.
Marrim një hotel në Tiranë. Sa mundësi ka një hotel në Tiranë të punojë sot? Si mund t’I kërkosh ti një sipërmarrësi që ka bërë një investim të jashtëzakonshëm, ka hyrë në borxh me bankat, tani jo vetëm që duhet të vrasi mendjen se si duhet të jetë në gjendje ta rifillojë biznesin, por të mendojë edhe të paguajë punonjësit e vet që nuk ka mundësi ti paguajë se nuk ka asnjë të ardhur.
Janë dy ndërhyrje që bëhen, në të gjithë qeveritë perëndimore. Qeveritë kanë marr përsipër pagat. Qeveria ka shumë mundësi për t’u financuar. Ato që më vijnë në mendje janë sigurisht shtyrja e disa shpenzimeve dhe investimeve që mund të shtyhen. E dyta, qeveria ka mundësi të marri borxhe. E treta, qeveria mund të shtypi para”, tha Shehaj.
I pyetur nga gazetari Blendi Fevziu, nëse shtypja e parave do të ndikonte inflacion, Shehaj tha: “Është çështje prioriteti. Është një vendim politik. Qeveria duhet të vendosi, të kujdeset për inflacionin, të kujdeset për borxhin publil, apo të kujdeset që biznesi të mbijetojë. Në muajin që ne jemi rrezikojmë, që të paktën mbi gjysma e të punësuarve të pushohen nga puna. Nuk është diçka që mund t’ja lësh në dorë sipërmarrësit”, tha Shehaj./Opinion.al
