Shqiptarët vijojnë të paguajnë shumë më tepër për një biletë avioni se sa në çdo vend tjetër të rajonit.
E shoqëruar kjo nga fakti që asnjë linjë ajrore lowcost nuk operon në Shqipëri, për shkak të taksave të larta aeroportuale.
Opinion.al pyeti gjatë një konference të linjës ajrore “Blu Panorama”, CEO-n e kompanisë Giancarlo Zeni se “Pse shqiptarët duhet të paguajnë shumëfish më shumë se sa në vendet e rajonit?”
Zeni i justifikooi çmimet e kripura me koston e lartë që kompania e tij është e detyruar ti paguajë aeroportit të vetëm në Shqipëri për shërbimet aeroportuale.
“Në fakt, kompania jonë së fundmi ka nxjerrë ofertat promocionale për biletat e flutirmeve që shkojnë deri në 60 euro ose më pak. Shumë më pak se sa kanë qënë, por shumat më të larta se sa vendet e rajonit, të cilave ju iu referuat, janë sepse për ne ka kosto si kompani. 45 euro është vetëm kostoja e aviacionit”-tha Zeni.
Por argumenti i shefit të “Blue Panorama” është kundërshtuar nga Zv.Drejtori i Autoritetit të Aviacionit Civil, Feliks Baçi, për të cilin çmimet janë politikë e kompanisë dhe jo pasojë e taksave të larta të aeroportit.
“Autoriteti ka kërkuar ulje çmimesh. Nuk jam dakort se është aeroporti përgjegjës. Mungesa e konkurrencës ka sjellë çmime të larta. Kemi rastin e konkurrencës mes aeroportit të Shkupit dhe Maqedonisë, prej së cilës Maqedonia shtyhet që të bëjë politika për ulje çmimesh, ndonëse kjo e tyre është një politikë ilegale, që bie në kundërshti me direktivat europiane”-pohoi Baçi.
Ndërsa Baçi përmend konkurrencën si promotore të uljes së çmimeve, sipas përfaqësuesve të agjensive turistike, çmimet e larta vijnë për shkak të aeroportit të vetëm që ka sot Shqipëria, i cili është kthyer në monopol, ndonëse i është hequr ekskluziviteti.
Nëse argumenti i “Blue Panorama” qëndron, përse qeveria shqiptare nuk ndërhyn te koncesionari i Rinasit për të ulur tarifat e shërbimeve? Dhënia e koncensionit, përse nuk pasohet me krijimin e mekanizmave monitorues të tarifave që aeroporti aplikon?
Një vit më parë qeveria premtoi se do të ndërhynte për uljen e çmimit të biletave dhe pas negociatave me aeroportin, i hoqi të drejtën e ekskluzivitetit të fluturimeve në Shqipëri dhe i shtoi 2 vite më shumë kontratën e koncensionit.
Një vit më pas, teksa çmimet janë rritur thuajse 30 përqind, teksa kemi vetëm një aeroport, në vend të uljes së çmimeve, vijon të mbetet pikëpyetja se “kush po i vjedh shqiptarët?”.
Opinion.al
