Më herët gjatë pranverës së këtij viti, një shpërthim misterioz hodhi në erë një makinë që transportonte një të dyshuar si operativ karteli, në mes të ditës, në një nga autostradat më të ngarkuara të Meksikë, pranë kryeqytetit të vendit.
Francisco Beltran u vra menjëherë së bashku me shoferin e tij, ndërsa trupat e tyre u gjetën të rrëzuar në sedilje pas shpërthimit të përqendruar.
I njohur si “El Payin”, Beltran akuzohej se ishte një anëtar i nivelit të mesëm i kartelit Sinaloa, një prej organizatave më famëkeqe të trafikut të drogës në Meksikë, sipas analistëve meksikanë të sigurisë dhe burimeve të njohura me aktivitetet e tij.
Autoritetet meksikane kanë ruajtur një sekret të madh rreth shpërthimit, por disa burime i thanë CNN se sulmi ishte një atentat i synuar, i mundësuar nga oficerë operativë të CIA-s. Një pajisje shpërthyese ishte fshehur brenda automjetit, tha për CNN Prokuroria e Përgjithshme e Shtetit të Meksikës.
Operacioni kundër Beltran ishte pjesë e një fushate të zgjeruar dhe më parë të pa raportuar të CIA-s brenda Meksikës, e udhëhequr nga njësia elitare dhe sekrete “Ground Branch”, për të shkatërruar rrjetet e konsoliduara të karteleve, thanë burimet, si dhe dy persona të tjerë të njohur me operacionin.
Presidenti Donald Trump ka përcaktuar disa prej këtyre grupeve si organizata të huaja terroriste dhe ka deklaruar se ato janë në luftë me Shtetet e Bashkuara. Që nga viti i kaluar, operativët e CIA-s brenda Meksikës kanë marrë pjesë drejtpërdrejt në sulme vdekjeprurëse ndaj disa anëtarëve të karteleve, kryesisht të nivelit të mesëm, thanë burimet.
“Vdekjeprurshmëria e operacioneve të tyre është rritur ndjeshëm”, tha një nga personat e informuar mbi operacionet. “Është një zgjerim i rëndësishëm i llojit të veprimeve që CIA ka qenë e gatshme të kryejë brenda Meksikës.”
Sipas burimeve, niveli i përfshirjes së CIA-s në operacione ka ndryshuar, duke filluar nga ndarja pasive e inteligjencës dhe ofrimi i mbështetjes së përgjithshme deri te pjesëmarrja e drejtpërdrejtë në atentate.
