TIRANE- Emisioni ‘Opinion’ i së martës ka rezervuar surpriza jo vetëm për shikuesit por dhe për të ftuarit. “Kush i vodhi milionat e CEZ?”, titullohej emisioni që kishte në fokus trajtimin në mënyrë të thelluar dhe analizimin e asaj që njihet si afera e CEZ me të cilën është lidhur edhe emri i kreut të Kuvendit Ilir Meta.
Gazetari investigativ Artan Hoxha i cili ishte në lidhje direkte me studion e ‘Opinion’ tha se në gjyqin e arbitrazhit të shtetit shqiptar me CEZ që po zhvillohet në Vjenë është edhe një dëshmitar i mbrojtur që dëshmon për llogari të palës shqiptare. Të ftuarit, Ylli Manjani, Lorenc Vangjeli, Enno Bozdo dhe analisti Artan Hoxha thanë se i dëgjojnë për herë të parë këto fakte ashtu si qindra mijëra teleshikuesit që ndoqën të martën “Opinion”-in.
Por jo vetëm kaq, sipas gazetarit Hoxha, dëshmitari që mbrohet nga RENEA është kërcënuar nga OSHEE dhe konkretisht nga jursiti i këtij insitucioni Rezart Ruço me argumentin se ka qenë ai personi që ka nxjerr dokumentet në media (referuar shkrimit të BIRN). “Për këtë kam edhe video”, tha Artan Hoxha dhe premtoi se do ta sillte në emisionin Opinion të ditës së enjte. Këto fakte të Artan Hoxhës nxitën debatin në studio, nga njëra anë Enno Bozdo që deklaron se kjo po e thellon skandalin dhe nga ana tjetër Ylli Manjani që përsëriste se gjithë kjo histori ka një regjisor të cilit nuk ia përmendi asnjëherë emrin, por nënkuptohet se bëhet fjalë për ish-ministrin e Energjetikës, Dritan Prifti.
Emisioni merr një rrjedh tjetër kur në lidhje telefonike futet personi që akuzohet se ka kërcënuar dëshmitarin e mbrojtur. Rezart Ruço duke iu përgjigjur pyetjeve të gazetarit, Blendi Fevziu, pranoi se ka një dëshmitar të mbrojtur. Pranoi gjithashtu se ka kërkuar takim me dëshmitarin e mbrojtur në një kafe të Tiranës, por nuk pranoi se e ka kërcënuar. “Kam kërkuar takim”, tha juristi, pasi ne (shteti shqiptar) kemi dyshime se dëshmitari i mbrojtur është ai që po na nxjerr dokumentet e gjyqit dhe po na dëmton”.
Emisioni ‘Opinion’ do ta vazhdojë historinë e aferës së CEZ edhe ditën e enjte.
