Ish-ministri i Jashtëm Ditmir Bushati ka shpërthyer sot nga foltorja e Kuvendit kundër votimit të kontratës koncesionare për një port MBM në Porto- Romano të Durrësit.
Ai kritikoi ashpër mënyrën se si është sjellë kjo kontratë në Parlament dhe i bëri apel Partisë Socialiste të mos e votojë atë.
Bushati iu referua fjalës së kryetarit të Kuvendit, Gramoz Ruçi kur ky i fundit tha “ne nuk jemi zotër të Shqipërisë” për të argumentuar se ky port nuk duhet ti jepet privatit.
“Sot po kërkohet të miratohet një kontratë për një koncesionar të ri, pa garë, pa procedurë dhe pa ligj, në një situatë të vështirë në të cilën po kalon vendi. Dua të filloj me një lutje në radhë të parë me ju zoti kryetar meqenëse jeni një deputet me shumë eksperiencë dhe shumë i matur në drejtimin e politikës shqiptare. Jam dakord kur thatë që nuk jemi Zota të këtij vendi dhe duhet të jemi të kujdesshëm me liritë politike dhe ekonomike të qytetarëve që përfaqësojmë. Në rast se do t’i qëndrojmë këtyre fjalëve do t’ju lutesha që të mos e votojmë këtë kontratë. T’i japim kohë vetes për të bërë një analizë sepse ne jemi Partia Socialiste e Shqipërisë. Jemi një forcë e qendrës së majtë dhe nuk kemi asnjë tagër, as si mazhorancë dhe as si Kuvend i Shqipërisë që të burgosim të ardhmen e gjeneratës së re. Nuk kemi asnjë tagër për të marrë vendime për 30 vitet e ardhshme. Po synohet që me këtë kontratë që portit të hidrokarbureve t’i ndryshohet në thelb objekti. Mjafton të bësh leksionin numër një në të drejtë civile për të kuptuar që thelbi i kontratës është objekti. Minimalisht sot duhet të kishim një projekt fizibiliteti. Kam respekt për kapitalin, kam respekt për çdo biznesmen. Duhet të ndahemi me oligarkinë. Nuk duhet të bëhemi si PD që ditën vajton dhe natën u shkel syrin oligarkëve. Nuk kemi pse i japim bonuse Presidentit që të dalë si garant i mbrojtjes së publikes. Interesin e publikes duhet ta mbrojmë ne. Ne jemi Partia e progresistëve dhe demokratëve shqiptarë. Ne kemi thënë që do t’i anulojmë koncesionet. Këtu është momenti për ta vërtetuar. Pse e kemi futur me procedurë të përshpejtuar, për 30 ditë nuk kemi mundësi ta analizojmë”, tha Bushati. /Opinion.al
