Britania ka tashmë numrin më të madh në Europë të viktimave nga pandemia e koronavirusit.
Zyra Kombëtare e Statistikave raporton se tashmë në spitalet dhe shtëpitë e kujdesit të të moshuarve në Britani kanë ndërruar jetë 32,313 persona, shkruan The Guardian.
Ky bilanc ka kaluar atë të Italisë, prej 29 mijë viktimash, i cili ishte më i rëndi prej muajsh në Europë që kur pandemia goditi Lombardinë.
Megjithatë zyrtarët e shëndetit në Britani thonë se kur vjen puna te vdekjet është e vështirë të bëhen krahësime mes shteteve pasi ka ende mospërputhje të mënyrave se si janë numëruar ato.
Vetëm javën e shkuar Britania nisi të numërojë vdekjet nga shtëpitë e kujdesit për të moshuarit, praktikë kjo që nuk është ndjekur gjithmonë njësoj.
Një tjetër faktor që e bën të vështirë krahasimin është se COVID-19 shkakton tek pacientët rëndim të sëmundjeve të cilat ata i kanë patur më përpara. Kështu që një pjesë e pacientëve që kanë ndërruar jetë kanë shfaqur komplikacione jo të lidhura drejtpërdrejtë me ato që shkakton COVID.
Vende të ndryshme i kanë numëruar ndryshe këto viktima, duke i klasifikuar si viktima të COVID vetëm ata që ndërronin jetë nga simptoma pulmonare.
Një diferencë tjetër midis Italisë, Mbretërisë së Bashkuar por edhe SHBA, është se në totalin e numrit të viktimave diku përfshihen rastet e dyshuara se kanë ndërruar jetë nga COVID-19 dhe dikur tjetër jo.
Megjithatë ajo që vlen të theksohet është se mbi 30 mijë persona kanë humbur jetën në Mbretërinë e Bashkuar prej pandemisë. Ata u goditën në një moment kur Italia po vuante shpërthimin në Lombardi. Thirrjet e para për rrezikshmërinë e këtij virusi u injoruan dhe tani pasojat reflektohen në grafikët me kurba ngjitëse. /Opinion.al
