Në daljen e tij për mediat ditën e sotme, zv/kryeministri Erion Braçe tha se nuk do të ketë tolerime për asnjë subjekt përsa i përket shkeljes së ligjit. Mbylljet e subjekteve për një kupon tha numri 2 i qeverisë bëhen thjesht në zbatim të ligjit.
“Gjatë këtyre 10 ditëve drejtoria e tatim-paguesve ka bllokuar llogarinë e 22 prej tyre. Disa kanë reaguar ndërsa disa të tjerë nuk kanë reaguar. Prej tyre kanë rënë telefonat e drejtorëve, deputetëve dhe disa ministrave. Po e përsëris. Mos u lodhni kot. Asnjë telefon nuk iu ndihmon dot. Beteja për të formalizuar çdo transaksion përfshirë edhe shërbimet në restorante dhe bare në vijën bregdetare është fokusuar tek njësitë e mëdha, Nuk kërkojmë prej tyre asgjë veç detyrimeve, kupon tatimor për çdo blerje dhe shitje. Janë mbyllur disa njësi. Nuk ju duhet as gjoba dhe as mbyllja e njësisë së tyre, Na duhet të punojnë ligjërish dhe të paguajnë detyrimet. Ata që kanë nisur këngën që po i mbyllni për një kupon , dua t’iu them se nuk bëhet fjalë për asgjë përveç zbatimit të ligjit. Secili prej tyre do kalojë në procesin e rivlerësimit”, tha Braçe.
Sa i përket bilanci të operacionit kundër informalitetit Braçe u shpreh se ka patur shkelje të rënda kryesisht në bizneset e hidorkarbureve ku diferencat mes litrave të regjistruar dhe atyre në kasa shkojnë në mijëra ton.
“Administrata tatimore ka zbuluar shkelje në kufijtë e krimit, veçanërisht në skemën kriminale të kalimit dhe operimit me kasat me regjim manual, ndaluar me ligj. Administrata tatimore ka zbuluar diferenca të thella mes litrave të regjistruara në pompa dhe litrave të regjistruar në kasa. Diferencat arrijnë në mijëra ton, nga vjeshta e 2017-s deri më sot”, u shpreh Braçe.
Erion Braçe bëri gjithashtu me dije se inspektorët tatimorë po përballen me kërcënime nga pronarët e subjekteve duke përmendur konkretisht administratorët e Havanës dhe Taivanit.
“Apel të gjithë administratorëve dhe pronarëve që kanë qenë në vëzhgim. Kërcënime ndaj nëpunësit të shtetit do të ndëshkohen pa mëshirë. I kërkoj administratorëve të Tajvanit dhe Havanës se çdo kërcënim i paraqitur ndaj inspektorëve që do të përballen me ligjin. Çdo gërmë kërcënuese do trajtohet si krim. Pavarësisht se presidenti nuk na e dha mundësinë për të vënë në zbatim kodin penal, ne do bëjmë aq sa na lejon ligji”, tha Braçe. /Opinion.al
