Qëndrimin e Maqedonisë së Veriut për t’iu përmbajtur sanksioneve të Bashkimit Evropian ndaj Rusisë për pushtimin e Ukrainës, e përshëndeti kreu i diplomacisë evropiane, Josep Borrell, gjatë vizitës së tij sot, të hënën, në Shkup. Borrell foli për një moment zgjimi për Evropën, duke theksuar se procesi i zgjerimit me vendet e Ballkanit Perëndimor duhet të ringjallet.
Maqedonia e Veriut ka qenë plotësisht në përputhje me politikën e përbashkët të jashtme dhe të sigurisë të BE-së, si dhe me paketën e sanksioneve të BE-së kundër Rusisë pas pushtimit të Ukrainës nga kjo e fundit.
“Vendimi për të ndarë sanksionet tregon qartë përkushtimin tuaj ndaj vlerave të BE-së dhe ju vë në rrugën drejt BE-së, jo vetëm si një vend kandidat, por edhe si një anëtar përgjegjës i komunitetit ndërkombëtar”, tha Josep Borrell pas takimit që ai pati në Shkup me kryeministrin e Maqedonisë së Veriut, Dimitar Kovaçevski.
Borrell njoftoi se do të kishte një raund të katërt sanksionesh kundër Rusisë.
Përfaqësuesi i Lartë e BE-së tha se kjo është një kohë zgjimi për Evropën, një kohë kur procesi i zgjerimit me vendet e Ballkanit Perëndimor duhet të ringjallet.
E di që keni disa pritshmëri dhe me të drejtë. Ne duhet të fillojmë zyrtarisht negociatat e pranimit me Maqedoninë e Veriut dhe Shqipërinë sa më shpejt të jetë e mundur dhe shpresoj se kjo do të jetë e mundur në konferencën e ardhshme ndërqeveritare,” tha Josep Borrell.
Ai theksoi se Maqedonia e Veriut dhe i gjithë rajoni janë prioritet strategjik dhe se BE-ja është e përkushtuar që perspektiva evropiane e këtyre vendeve të bëhet realitet.
Zoti Borrell përshëndeti momentin e ri ndërmjet Maqedonisë së Veriut dhe Bullgarisë dhe kërkoi që të dyja vendet të gjejnë zgjidhje të pranueshme reciprokisht dhe të zgjidhin çështjet dypalëshe, sepse, siç tha ai, “zgjerimi nuk mund të vazhdojë nëse pengohet nga çështjet dypalëshe”.
Prej një viti e gjysmë, Bullgaria ka bllokuar fillimin e negociatave të anëtarësimit midis Maqedonisë së Veriut dhe BE-së për shkak të dallimeve të hapura etnike, gjuhësore dhe historike midis dy vendeve.
Kryeministri i Maqedonisë së Veriut tha se gjendja aktuale e stanjacionit nuk i bën dobi askujt dhe se pengimi i negociatave për anëtarësim ndërmjet BE-së dhe Maqedonisë së Veriut ndihet në të gjithë rajonin.
Është e nevojshme që Maqedonia e Veriut të ketë një perspektivë të fortë dhe të qartë evropiane”, tha Dimitar Kovaçevski.
Ai falënderoi zotin Borrell për mbështetjen e tij të qartë që vendi të marrë një datë për fillimin e negociatave të pranimit pa vonesë dhe theksoi se vetëm një Evropë plotësisht e bashkuar mund të jetë e fortë.
“Në mes të paqëndrueshmërisë së paprecedentë, ekziston nevoja që Evropa të jetë e bashkuar dhe e fortë. Lufta e vazhdueshme është një kërcënim për rritjen e ndikimit të palëve të treta në rajon dhe për këtë arsye ne të gjithë duhet të jemi shumë të kujdesshëm dhe të përgatitur. Integrimi i shpejtë i Maqedonisë së Veriut dhe rajonit në BE do të sigurojë stabilitet në Evropë”, theksoi gjithashtu Kovaçevski.
Lidhur me pushtimin rus të Ukrainës, Dimitar Kovaçevski kujtoi se Maqedonia e Veriut, si anëtare e NATO-s dhe vend kandidat për anëtarësim në BE, e ka përafruar qëndrimin e saj me aleatët e saj, SHBA-në dhe NATO-n.
Përfaqësuesi i Lartë i BE-së po bën një turne në Ballkanin Perëndimor për të riafirmuar angazhimin dhe mbështetjen e BE-së për rajonin në mes të luftës ruse kundër Ukrainës dhe implikimeve të saj për sigurinë e Evropës në tërësi.
Pas Shkupit, Josep Borrell do të udhëtojë nesër, e martë drejt Tiranës, ndërsa një ditë më pas do të vizitojë Sarajevën, Bosnje-Hercegovinën./Opinion.al
