Një ditë pas operacionit policor për arrestimin e të ashtuquajturve biznesmenë janë mësuar detaje nga skema e mashtrimit që ata kanë përdorur për të zhvatur shtetin. Ata kanë arritur të marrin nga Tatimet plot 9 milionë dollarë.
11 biznesmenët e akuzuar për mashtrim me TVSH kishin regjistruar subjekte tregtare në mënyrë fiktive, në fushën e ndërtimit. Ata nuk kishin asnjë lloj aktiviteti tregtar, edhe pse lëshonin fatura TVSH-je për hyrje-dalje mallrash. Këto fatura fiktive i dorëzonin tek Drejtoria e Tatimeve ku merrnin rimbursimin e TVSH-së prej 20% për çdo blerje që kishin kryer.
Administratorët e këtyre bizneseve janë Dhimitraq Çelo, Shkëlqim Hasani Bujar dhe Ruzhdi Murataj, Indrit Sulaj dhe Nevruz Lami. Më këtë skemë mashtrimi kane marre pjese edhe 5 persona të tjerë të shpallur në kërkim. Te gjithe sebashku i kanë shkaktuar shtetit një dëm ekonomik prej 9 milionë dollarësh.
Nga deklarimet e të arrestuarve del se Nevruz Lami ka kontaktuar me 10 personat e tjerë që janë pjesë e këtij hetimi duke i mashtruar se do t’u gjente punë. Ai u kishte marrë letër-njoftimet personave nën hetim, duke i dërguar tek noterja për të firmosur prokura dhe më pas bizneset janë regjistruar në QKR.
