Kur kanë kaluar disa orë nga zhdukja e avionit tip “Piper” ku udhëtonte futbollisti argjentinas Emiljano Sala, nuk ka ende të dhëna çfarë ka ndodhur me mjetin fluturues dhe anëtarët e bordit.
Sala, lojtar i Nantës në kampionatin francez po udhëtonte drejt Kardifit për të firmosur kontratën e jetës me ekipin që militon në Premier League.
Tashmë nuk ka dyshime që futbollisti 28 vjeçar udhëtonte me këtë avion të vogël.
Këtë e konfirmon klubi i tij Nanta por dhe Policia.
Babai i sulmuesit, i tronditur nga ngjarja e të birit, tha për “Radio Continental” se herën e fundit kur kishte biseduar me djalin e tij ishte ditën e dielë.
“Unë nuk di asgjë, unë jam në Argjentinë. Fola të dielën me Emilianon”.
I shqetësiar për atë çka po ndodh është edhe Mehmet Dalman, Presidenti i klubit të Kardifit.
“Jemi shumë të shqetësuar për Emiliano Salën. Presim konfirmimin se çfarë ka ndodhur”, tha ai për mediat.
