Partia Demokratike ka reaguar në lidhje me emërimin e Besart Kadias në postin e zv/ministrit të Financave dhe Ekonomisë.
Kadia ka qenë pjesë e strukturave të PD, ndërsa ka mbajtur dhe postin e sekretarit për sipërmarrjen e lirë në këtë parti.
Ndërkohë, PD sqaron se Besart Kadia është shkarkuar që në 5 nëntor të 2019 nga funksionet që ka pasur në selinë blu.
Sipas PD, vendimi për shkarkimin e tij ka ardhur për shkak se ishte nismëtar i krijimit të lëvizjes politike ‘Alternative’ e financuar nga burime të dyshimta financiare të klientëve preferencialë të qeverisë.
PD thekson se Kadia nuk do të ketë në të ardhmen funksione në këtë parti.
“Z. Besart Kadia, është shkarkuar nga funksioni i anëtarit të Këshillit Kombëtar të PDSH, që më datë 5 Nëntor 2019, për shkak se ishte nismëtar i krijimit të lëvizjes politike “Alternativa”, e financuar sipas informacioneve të verifikuara nga burime të dyshimta financiare të klientëve preferencial të Qeverisë. Që nga ajo datë z. Kadia nuk ka asnjë funksion në PD dhe nuk mund të ketë as në të ardhmen. Atij i është hequr e drejta për të zgjedhur dhe për t’u zgjedhur në strukturat e Partisë Demokratike, për shkelje të parimeve bazë të funksionimit të PDSH, të sanksionuar në nenin 9 të Statutit të PDSH-së.”– shkruan PD./ Opinion.al
