Ish-kryeministri Sali Berisha në një dalje për mediat këtë të enjte ka deklaruar se zgjedhjet e 14 majit ishin farsa më e madhe elektorale që ka përjetuar vendi ynë.
Gjatë fjalës së tij, Berisha denoncoi se në këto zgjedhje u rikthye nga pushteti loja me listat e votimit, ku sipas tij mbi 200 mijë qytetarëve iu ishte transferuar qendra e votimit, pa u pyetur.
Sipas tij, vetë KQZ pohon se për këtë shkak nuk votuan ditën e votimit 180 mijë shqiptarë, të zgjedhur me garanci të plota në bazën e kriterit të bindjeve politike.
Nga disa llogaritje të bëra nga vetë ish-kryeministri, rezultojnë në 2023 qytetarët votuan më pak se në 2021 saktësisht 265 mijë zgjedhës, ku mbi 200 mijë iu hoq e drejta e votimit për arsye politike thotë ai.
“Blerja e votës nuk u shfaq për herë të parë në farsën e vitit 2023. Ajo është denoncuar nga shqiptarët, mediat shqiptare dhe ndërkombëtare, komisionet e vëzhgimit dhe në raste të tjera. Por, në këtë farsë, si kurrë më parë, ndërhyrja ishte e atyre përmasave të tmerrshme sa rrëzoi euron, monedhën më të fuqishme të Europës, në nivele që ajo nuk i kishte përjetuar kurrë më parë. Pra, ky është një tipar i industrisë mafioze shtetërore të blerjes së votës. Por, farsa elektorale e majit 2023, gërshetoi në mënyrën më të shëmtuar dy stile të farsave elektorale. Stilin e narkoshtetit dhe mafies së tij me stilin Putin, i cili parakupton përdorimin e të gjitha mjeteve të shtetit për kontrollin e votës së lirë të qytetarëve dhe ndryshimin e rezultateve. Në dallim nga zgjedhjet e mëparshme, në këto zgjedhje u rikthye me të gjithë pasojat e shëmtinë e tij, loja me listat e votimit, përjashtimi i zgjedhësve nga qendrat e votimit nëpërmjet listave të votimit. PD e denoncoi publikisht aktin kriminal elektoral të Edi Ramës dhe ministrit të familjes së tij, Çuçi, të cilët ndryshuan qendrat e votimit të 1.3 milionë zgjedhësve.
PD e denoncoi këtë akt si një përpjekje brutale për t’u mohuar të drejtën e votës sipas bindjeve politike qytetarëve shqiptarë. Dita e votimit ishte ditë e përjashtimit të më së paku mbi 200 mijë zgjedhësve shqiptarë. Emrat e tyre ishin transferuar në qytete të tjera, në zona të tjera. Pa asnjë paralajmërim dhe në kundërshtim me çdo ligj të vendit. Vetë KQZ pohon se për këtë shkak nuk votuan ditën e votimit 180 mijë shqiptarë, të zgjedhur me garanci të plota në bazën e kriterit të bindjeve politike. Mediat të cilat bëjnë një zhurmë shumë të dëmshme për shoqërinë, me të cilën përpiqen të sfumojnë megakrimin elektoral të përmasa të papara, se pjesëmarrja e ulët se 2021, vjen për shkakun që opozita s’pati alternativë. Nuk ka gënjeshtër më të rëndë se kjo. Opozita dhe kronikat gjatë fushatës faktonin se opozita ishte dhe kishte alternativë për çdo bashki, sa asnjëherë tjetër.
Në 2013 votuan 1 mln e 313 mijë zgjedhës, në 2021 votuan 1 mln e 570 mijë zgjedhës. Pra në 2023 votuan më pak se në 2021, 265 mijë zgjedhës, mbi 200 mijë iu hoq e drejta e votimit për arsye politike”, tha Berisha./Opinion.al
