Kreu i Partisë Demokratike Sali Berisha ka publikuar dëshminë e një prindi të mitur, i cili është shoqëruar gjatë protestës.
Sipas dëshmisë së tij pretendohet se molotovët i janë futur në çantën e shkollës dhe më pas i mituri është arrestuar.
“Djali ka qenë duke ngrënë sufllaqe bashkë me kushëririn e vet 14 vjeç. Kanë qenë duke ardhur këtej nga krahu i Lanës, sa kanë kaluar shkollën Ismail Qemali. Tek Ura e Tabakëve. Kanë pasur çantën e shpinës të shkollës me gjithë librat. Ka ardhur njëri dhe ua ka futur në çantë. Këta janë trembur se nuk i njihnin se ishte gjithë ai burrë. I ka thënë shkoni dhe hidhini tek protesta. I kanë kapur në orën 8 pa ca kur ne ishim akoma tek protesta. Dhe po u kapi njeri, thoni që na kanë dhënë lekë. Në atë moment, nuk kanë bërë djemtë as 10 hapa, kanë ardhur civilët dhe i kanë arrestuar. Imagjino ti”, është dëshmia e prindit e publikuar nga kreu demokrat.
Berisha akuzoi policinë për veprime të paligjshme dhe tha se mbi 50 demonstrues janë ndaluar ose shoqëruar, duke pretenduar se një pjesë e tyre nuk kishin marrë pjesë në protestë.
“Janë ndaluar, janë shoqëruar mbi 50 demonstrues. Një pjesë e mirë e tyre nuk kanë marrë kurrë pjesë në protesta. Një pjesë e policisë janë sjellë me rrugaçëri, në mënyrë antiligjore, janë sjellë si patronazhistë dhe kriminelë të vërtetë. Ndërkohë mund t’u them se dje ka pasur një dallim të qartë në qëndrimin e një pjese të mirë të policisë, e cila ka realizuar dhe po realizon se mbrojtja e hajdutëve nuk është detyrë në emër të ligjit dhe të atdheut”.
Ai akuzoi kryeministrin Edi Rama si përgjegjës për situatën, ndërsa u bëri thirrje punonjësve të policisë të mos ndjekin udhëzimet e drejtuesve që ai i quajti të papranueshme.
“Ftoj policët e ndershëm, familjarë të ndershëm, burra, gra, vëllezër, motra të familjeve të mira të mos ndjekin udhëzimet e kriminelëve Proda dhe Bizhga, por në rastin më të parë të bashkohen me demonstruesit. Edi Rama është një armik i qenies së tyre, i kombit shqiptar, është një armik i paimagjinueshëm që po i bën vendit të zezën më të madhe që i ka bërë ndokush me ligjin mburojë për të mbrojtur vjedhjet e tij dhe ministrave të tij”.
