Kreu i Partisë Demokratike, Sali Berisha, në një deklaratë për mediat këtë të enjte ka shprehur mirënjohje të thellë për presidentin gjerman Frank-Walter Steinmeier, i cili sipas Berishës është kujdesur për ish-presidentin Bujar Nishani në momentet kritike të jetës së tij.
Berisha e falenderoi Walter Steinmeier në emër të Partisë Demokratike për aktin dhe gjestin e tij njerëzor.
“ Presidenti Steinmeier si ministër i Jashtëm i Republikës Federale ka mbështetur fuqimisht çlirimin e Kosovës së bashku me qeverinë e tij. Interesi i tij për Shqipërinë e shqiptarët ka qenë gjithnjë prezent. Por unë kam një mirënjohje më të veçantë sot për të. Për kujdesin e tij njerëzor tejet të çmuar që tregoi për presidentin Bujar Nishani në momentet më kritike të jetës së tij, kështu që në këtë rast në emër të Partisë Demokratike, i shpreh mirënjohjen më të thellë për aktin dhe gjestin e tij njerëzor në mbështetje të përpjekjeve të presidentit Nishani në sëmundjen e tij”, është shprehur Berisha.
