Këtë të shtunë, ish-kryeministri Sali Berisha, prezantoi kandidatin Ardi Muka, për bashkinë e Durrësi, të koalicionit “Shtëpia e lirisë”.
Nga Hamallaj, Berisha sulmoi kryeministrin Edi Rama por edhe kreun e PD, Lulzim Basha.
Berisha nënvizoi gjithashtu se të gjithë demokratët të mos i japin asnjë votë logos së konfiskuar nga Basha, të cilin e konsideroi një lider të dobët.
“Nuk duhet të heqim dorë nga përpjekjet për ndryshim. Duhet t’iu kthejmë shpresën të rinjve. Të mos ia lemë në dorë një njeriu që po shkatërron vendin, për të cilin ka rëndësi aleanca me Beogradin. Përveç përfaqësuesit të Ramës garon dhe përfaqësuesi i Bravës dhe ai është Luan Monopoli. Luan Monopoli pasurohet me monopolin e paligjshëm që i ka firmosur Rama. Rama ka zgjedhur këtë demokrat për t’i dhënë shërbimet portuale nga Saranda në Shëngjin. Në shtator pret të rinovojë kontratën për monopolin dhe imagjinojeni sesa do të mbrojë interesat tuaja. Asnjë votë për logon e konfiskuar të PD që Rama me policë ia dha Lulzim Bravës. Çfarë lideri është Lulzim Brava? Këdo të pyesësh të thotë është lider i dobët. Nuk fitohet me të. Njëherë thotë janë zgjedhje të rëndësishme njëherë thotë nuk janë. A mundet të votohet një njeri që kalon nga humbja në humbje”, tha Berisha.
