Kreu i Partisë Demokratike, Sali Berisha, ka mbajtur një takim me fermerët e Dimalit.
Gjatë fjalës së tij, Berisha tha se gjatë 12 viteve të qeverisjes aktuale, fermerët shqiptarë janë diskriminuar e janë ndëshkuar me buxhete subvencione të ulëta.
“Unë vij sot tek ju për të parashtruar programin tonë me të cilin duam të garantojmë çdo fermer, se ky program ka si qëllim më kryesor suksesin e rritjen e mirëqenies të fermerëve shqiptarë, të cilët ndërtojnë jetën e tyre në lumenj djerse, mundi e sakrificash. Do bëjmë gjithçka që këto sakrifica të japin më shumë për ju, familjen tuaj e për vendin. Ky është qëllimi i programit tonë.
Ne konsiderojmë diskriminim që ju bënë ju këto 12 vite. Një diskriminim të pafalshëm. Fermerët mjafton tju them një shifër. Nëse fermerët në Maqedoni, Kosovë, Mal të Zi dhe Serbi merr sot 5 herë më shumë se ju subvencione, ky është diskriminim e ndëshkim për ju. Pse është ndëshkim se hapja e tregut ju bën të pamundur ju të konkurroni me ata”, tha Berisha.
Më tej, ai theksoi se do të ndalohet importi i imputeve bujqësore që nuk shitet në BE dhe çdo import i tillë do të shpallet krim i rëndë.
“Do ndalohet importi i imputeve bujqësore që nuk shitet në BE dhe çdo import i tillë do të shpallet krim i rëndë. Nuk kanë pse të vijnë pesticide kancerogjene dhe tua prishin prodhimin. I parë që kapet duke shitur të tilla do të dënohet për krim të rëndë në Shqipëri”, tha Berisha.
