Kryetari i Partisë Demokratike, Sali Berisha, në konferencën e përjavshme me mediat të zhvilluar në Gjirokastër ka deklaruar se është rënë dakord që Partia e Lirisë të mbështesë kandidatët e Partisë Demokratike në zgjedhjet lokale. Më tej Berisha theksoi se Partia e lirisë do të përqendrohet në listat e këshillave.
“Është rënë dakord! Zoti Meta mendon se ai do të përqendrohet totalisht, pothuajse, do të mbështesë kandidatët tanë dhe do përqendrohet në listat e këshillave. Me aleatët e tjerë është rënë dakord që pranojnë testimin e primareve por kërkojnë një testim shtesë. Ne nuk kemi kundërshtim kërkojmë që të përfshihen njerëzit më me reputacion”-tha Berisha.
Ndër të tjera, Berisha nënvizoi se çdo deputet i PD-së ka të drejtën të propozojë, por shtoi kryedemokrati PD-ja nuk do të heqë dorë nga primaret.
“Çdo deputet i PD ka të drejtë të propozojë, ka të drejtë të kandidojë për cilëndo bashki të vendit. Ne nga primaret nuk heqim dorë. Është kategorike, është rithemelimi ynë dhe nuk heqim dorë”, tha Berisha.
