Fajtori i vetëm për mos hapjen e e negociatave, për Lulzim Bashën është Edi Rama! Kreu i PD-së në një konferencë për mediat tha se fjalimi i Ramës këtë të enjte në Kuvend ishte i pritshëm.
“Në mënyrën se si Edi Rama rrezikon rrugën e shqiptarëve për integrimin evropian, e kam thënë se shpejt do vijë dita kur të tregojë se kush janë fajtorët: opozita, ju mediat, partitë evropiane por jo ai vetë. Është kaq i parashikueshëm, sa dhe fjalimi që mbajti në pseudo-parlament. Nuk është dështim i shqiptarëve, por i Edi Ramës. Ky dështim ka vetëm vulën e tij përsipër, premtoi se do të hapë negociatat dhe siç tregoi qartë dështoi. Shqiptarë e dinë fare mirë, se ku nuk është dështimi i parë, por dështimi më i freskët me krizën dhe kaosin ku e ka futur vendin. Për këtë arsye, shqiptarët po largohen nga vendi, ekonomia është në kolaps, ndërsa kushtet sa vijnë dhe shtohen”, tha Basha.
“I iku përgjegjësisë për krimin, për drogën, përgjegjësisë për blerjen e votave. Për kriminelët në politikë, duke i ikur përgjegjësisë për mbrojtjen e atyre që janë në listën e zezë të SHBA”, theksoi më tej kreu i PD-së.
Sipas Basha nuk ka kohë për të humbur me njerëz që kanë dështuar. “Njerëzit e përgjegjshëm, duhet ti dalin zot vendit”, theksoi Basha. Në fjalën e tij para deputetëve, Kryeministri Edi Rama tha se BE është në diskutime të brendshme dhe nuk është gati për “krushqi me Shqipërinë”.
“Shqipëria sot është pa diskutim shumë më gati për të hapur negociatat, se ç’kanë qenë të gjitha vendet e tjera para se të hapnin negociatat. Të gjitha, pse? Sepse procesi për të çuar drejt hapjes së negociatave, është bërë shumë më i komplikuar dhe më kërkues. Sot Shqipëria kërkon çeljen e negociatave, dhe kush është pikëpyetja? Sa dhe si Franca do ta adresojë këtë kërkesë?…Të thonë kemi këto 3 kushte, ti shkon me 3 kushtet e plotësuara, të thonë na fal se kemi edhe 9 të tjera. Çfarë do të thotë kjo? Kjo do të thotë se ata me të cilët do t’i të bësh krushqi, nuk janë gati ta bëjnë krushqinë. Nuk janë gati ata, mos u bëni qesharakë. Nuk janë gati ata. Natyrisht ata janë në pozicionin e forcës.”/ Opinion.al
