Kryetari i grupit parlamentar të Partisë Demokratike, Gazment Bardhi, ka mbajtur fjalën i pari në mbledhjen e përbashkët të deputetëve të opozitës të thirrur prej tij, ku të pranishëm kanë qenë edhe grupi i Sali Berishës.
Në fjalën e tij, Bardhi deklaroi se debatet brenda opozitës gjatë këtyre 2 viteve i kanë krijuar komoditet qeverisë së Ramës, të cilën ai e cilësoi si një nga qeveritë më të korruptuara në Evropë.
Më tej, Bardhi theksoi se opozita duhet të unifikojë qëndrimin në aksionin kundër keqqeverisjes së Kryeministrit Edi Rama.
“Për fat të keq debatet brenda opozitës gjatë këtyre 2 viteve i kanë krijuar një komoditet një prej qeverive më të korruptuar në Europë po ndoshta edhe në glob. Kjo e bën emergjente në gjykimin tim këtë takim të parë me prezencën e të gjithë deputetëve të opozitës në parlament, dua të përshëndes kolegët që janë lidhur online për shkak se ndodhen jashtë vendit, znj. Jorida Tabaku, znj. Ilda Dhori, z.Lefter Gështenja dhe z.Petrit Doda.
Një nga çështjet që na bën të gjithë bashkë është prioriteti që kemi shpallur më parë, masakrën zgjedhore që bën urgjente detyrën e opozitës.
Në Kuvendin e Shqipërisë ka funksionuar një komision i Reformës Zgjedhore në 2 vite punë dhe nuk ka arritur të prodhojë asnjë produkt.
Çështja e parë që duhet të diskutojmë është se si opozita parlamentare do ta çojë përpara Reformën Zgjedhore.
Bën të dosmosdoshme ndërtimin e një axhende llogaridhënie nga opozita përmes ngritjes së disa komisioneve hetimore. Duke qenë se është takimi i parë pas zgjedhjeve të 25 Prillit, gjykoj që sot duhet të flasim për çështje që na bëjnë bashkë, për të ndërtuar një axhendë të përbashët parlamentare. Respektoj secilin në këtë sallë për çështje që na kanë ndarë deri në këtë moment. Por ndasitë në mendime nuk duhet të na shfokusojnë nga përgjegjësia që kemi ndaj qytetarëve. Prandaj duke respektuar qëndrimi apo mendimi individual i secilit prej kolegëve, ndaj bindjen që kjo nuk do të na pengojë që sot të unifikojmë një qëndrim të aksionit tonë opozitar kundër keqqeverisjes së Edi Ramës”, deklaroi Gazment Bardhi.
Në këtë mbledhje përbashkuese të opozitës janë të pranishëm 43 deputetë.
