Kryeministri, Edi Rama, në një deklaratë për mediat këtë të martë i pyetur nga gazetarët nëse do të ketë maxhoranca bashkëpunim me opozitën për zgjatjen e mandatit të anëtarëve të Vettingut dhe çështjet e tjera tha se “është gjithçka për t’u parë sepse nuk dimë më kush është kush në këtë histori”, duke iu referuar Bashës dhe Berishës.
Ndër të tjera, kryeministri u shpreh se veç e veç, Basha e Berisha nuk kanë legjitimitet.
“Është gjithçka për t’u parë sepse nuk dimë më kush është kush në këtë histori. Sigurisht këta dy përfaqësues nuk kanë asnjë legjitimitet veç e veç. Sigurisht që deputetët e PD, pavarësisht njërit apo tjetrit janë legjitimë, sepse janë aty me votën e popullit. Situata është jashtëzakonisht e vështirë dhe do të shohim… Uroj që të jetë një proces që shkon drejt një zgjidhje paqësore, dhe dhuna që pamë të mbeten pas”, tha Rama.
Sa i përket reagimit të Policisë së Shtetit në protestën e së shtunës, Rama tha:“Policia e Shtetit ishte në sfidën e vet më të vështirë në këto 30 vite sepse kurrë ndonjëherë më parë nuk e ka pasur sfidën që të futet në oborrin e një partie për të ndarë dy palë që kacafyten. E ka trajtuar çështjen me një qetësi për t’u admiruar. Por gjithçka mund të ishte shmangur, nuk kishte nevojë për ta fortifikuar, mund të ishte thirrur policia dhe mund të ishte mbrojtur (godina e PD)”.
