Rreth 24 orë përpara protestës, kreu i opozitës, Lulzim Basha ka kryer takime me qytetarët në Durrës, Kamëz dhe Vorë. Ai ka folur edhe me strukturat e PD në lidhje me organizimin e protestës së nesërme.
Gjatë takimeve, Basha ka qenë i shoqëruar nga sekretari i përgjithshëm, Gazment Bardhi dhe përfaqësues lokalë të Partisë Demokratike.
Basha i ftoi qytetarët, që ashtu siç kanë bërë edhe në 9 protestat e tjera kombëtare, të jenë në krye të lëvizjes kombëtare për ndryshim, për largimin e Edi Rames dhe krijimit te një qeverie qe garanton zgjedhje te lira e te ndershme.
Takimet informale të kreut të opozitës kanë nisur dje në Kavajë dhe Elbasan, nga ku ai përcolli si sot, mesazhet e opozitës që të gjithë qytetarët që refuzuan Ramën në zgjedhjet e 30 qershorit të bashkohen në protestë kundër qeverisë së tij.
“Masivisht duhet t’i bashkohemi protestës së ditës së nesërme për të treguar se të gjithë bashkë do ta bëjmë Shqipërinë si gjithë Europa. E nesërmja është bashkim i qytetarëve europianë që luftojnë për vlerat dhe parimet europiane.”-tha Basha në takimin informal që zhvilloi në Durrës mbrëmjen e së dielës.
Protesta e dhjetë kombëtare e opozitës pritet të nisë nesër në orën 20:00. Axhenda e saj ende nuk është zbuluar. Forcat e policisë do të angazhojnë rreth 1200 efektivë megjithëse përfaqësuesit e opozitës kanë thënë se protesta do të jetë paqësore. /Opinion.al
