Akuzat për pastrim parash janë bërë nga Rama thjesht për të tërhequr vëmendjen nga përgjimet e gazetës Bild ka deklaruar kreu i opozitës, Lulzim Basha.
Në përfundim të takimit me të rinjtë në Krujë, ai u pyet në lidhje me vendimin e prokurorisë për ta çuar atë dhe dy ish-funksionarë të Partisë Demokratike përpara gjykatës me akuzën e falsifikimit të formularëve.
Basha tha se të gjitha akuzat e ngritura ndaj tij janë fabrikuar nga kryeministri Rama për të postuar vëmendjen por sot sipas tij prokuroria i rrëzoi këto pretendime dhe shtoi gjithashtu se ai do të “çmontojë” në gjykatë edhe akuzën për të cilën është marrë si i pandehur.
Lulzim Basha: Sot 90% e gënjeshtrës u rrëzua dhe 10% do të rrëzohet në gjykatë. Pra, sot dolën provat që prokuroria ishte përdorur nga Edi Rama për të fabrikuar gënjeshtra që as vetë nuk i beson dhe u detyrua të tërhiqej nga gënjeshtrat, me të cilat operoi për dy vite me radhë. Tha që kishte prova për pastrim parash vetëm për të hequr vëmendjen nga skandalet e dosjes “339”, që publikoi gazeta “Bild”. Vetëm për këtë arsye fabrikoi këtë akuzë. Tha që kishte dokumente për para ruse dhe e vetmja gjë që prodhoi ishte tërheqja me turp nga këto akuza. Nuk prodhoi asnjë dokument për këtë akuzë qesharake dhe të turpshme, me të cilën u detyrua të gënjente opinionin publik për dy vite me radhë. Tha që kishte dokumente hetimi kundër PD dhe i vetmi dokument hetimi është dokumenti i Bilalit. Prandaj, e vetmja gjë që mund të them sot është se 90% e gënjeshtrës sot është çmontuar para gjithë shqiptarëve. Prokuroria është detyruar të pranojë gënjeshtrat, të cilat i fabrikoi për shkak të presionit politik të Edi Ramës dhe atë 10%, me të cilën ka çuar dosjen në Gjykatë, do të çmontojmë në gjykatë.
Pyetje: Si zoti Basha? Ju akuzojnë si fallsifikatorë.
Lulzim Basha: Vetëm përmes të vërtetës. Ky është minimumi, na akuzuan për agjentë rusë, na akuzuan për pastrim parash, na akuzuan për gjithçka që u duhej. Për çdo skandal që u plaste nxirrnin nga një akuzë. Pra, e vetmja gjë që na solli deri këtu është qëndresa për të vërtetën dhe e vërteta do të çmontojë plotësisht edhe këtë 10% që ka mbetur. 90% ka rënë edhe 10% do ta çmontojmë në gjykatë.
Pyetje: Lidhjet me rusët?
Lulzim Basha: Lidhjet me rusët i ka vëllai i Presidentit më të dashur të Putinit në Ballkan. Këtë gjeagjëzë zbërthejeni vetë se besoj i keni informacionet se kush është. /Opinion.al
