Grupi Parlamentar i Partisë Demokratike vendosi që ti drejtohet Kuvendit me një kërkesë për mbajtjen e një referendumi që ndalon importin e mbetjeve në vend.
Vendimin e bëri të ditur kryetari Lulzim Basha, i cili tha se PD do mbështesë protestat e qytetarëve. Basha akuzoi Ramën se ka mashtruar shqiptarët dhe se pas miratimit të ligjit fshihen interesa të mafias së plehrave.
Ai u shpreh se “Rama drogoi Shqipërinë, tani do ta helmojë. Rama bëri aferë me kartelin e plehrave. Importi i plehrave është një shkatërrim i demokracisë në vend. Kjo është një prerje në besë ndaj qytetarëve. Duhet t’i kundërvihemi bashkërisht të gjithë”.
Më tej Basha vijoi: “Nesër kërkesë në Kuvend nga grupi i PD për referendum për ndalimin. Shqiptarët ndihen të tradhtuar, një tufë mafiozësh duan të kthejnë plehrat. Nuk patëm kritika në mbledhje grupi, patëm debat dhe vendim unanim. Unë dal plotësisht kundër ligjit të vitit 2011. Mbështesim plotësisht protestën e thirrur nga Aleanca Kundër Importit të Plehrave. PD nuk vendos asnjë grup interesi mbi qytetarët. Duhet referendum, duhet të dëgjojmë zërin e qytetarëve për importin e mbetjeve”, tha Basha”.
Menjëherë pas kësaj deklarate ka reaguar Kryeministri Edi Rama. Në një postim në Facebook ai shkruan: “Tani që Luli kapi flamurin e luftës me rrezikun imagjinar kuptohet kollaj se në ç’kazan fshihet lepuri i rrenës për ligjin tonë mbi mbetjet”.
