Kreu i opozitës Lulzim Basha ka reaguar një ditë pas protestës, përpara Kryeministrisë. Në një postim në rrjetet sociale ai shkruan se “bashkimi madhështor i vullneteve të qytetarëve është besimi i çdo shqiptari tek ndryshimi që po vjen.
“Kjo krizë do të zgjidhet jo mbi pazare, por mbi parime. Rruga për të dalë prej saj kalon përmes standarteve europiane: Para drejtësisë hajdutët e votave, largimi i Edi Ramës, reformë e thellë politike, dhe zgjedhje të lira e të ndershme. 30 qershori është varreza politike e Edi Ramës dhe Organizatës Kriminale të Rilindjes. Largimi i tij është vetëm fillimi”, shkruan Basha.
Si asnjëherë më parë në protestat e muajve të fundit, nuk u shënua as incidenti më i vogël. Basha pas fjalës së tij, i ftoi sërish mbështetësit e opozitës të marshonin drejt selisë së Parlamentit.
Edhe këtu nuk pati asnjë incident, ndërsa zoti Basha, pas një qëndrimi të shkurtër u drejtua për në selinë e Partisë Demokratike./ Opinion.al
