Nga Elbasani, ku ishte sot gjatë protestës së opozitës, Lulzim Basha ka thënë se më 30 qershor nuk do të ketë zgjedhje në Shqipëri, por do të jetë dita kur do të caktohen zgjedhjet e ardhshme nën organizimin e qeverisë tranzitore.
“Më 30 qershor nuk do të lejojmë farsë zgjedhore, zgjedhje pa opozitën nuk mund të ketë dhe nuk do të ketë, proces fals zgjedhor ku dhunohen shqiptarët dhe kapen peng bashkitë që të zhvasin qytetarët, kjo ditë nuk do të gdhijë më 30 qershor. Do të jetë dita e bashkimit të shqiptarëve për të caktuar një datë tjetër për zgjedhjet, nën kujdesin e një qeverie tranzitore pa Edi Ramën kryeministër”, tha Basha.
Ai foli edhe për rrezikun e rikthimit të vizave, duke iu drejtuar direkt faktorit ndërkombëtar.
“Sot ju drejtohem miqve europianë dhe ju them mos ndëshkoni popullin tim, mos riktheni vizat për shqiptarët, ne do t’ia heqim vizën Edi Ramës. Ne do t’i kthejmë shqiptarëve dinjetin, mundësinë dhe lirinë”, u shpreh Basha nga Elbasani.
Kreu i Partisë Demokratike foli edhe për protestën e ardhshme të 11 majit, duke thënë se opozita është e vendosur për të mos bërë hapa pas.
“Më 11 maj, ditën e shtunë, do të kemi protestën e katërt kombëtare në më pak se tre muaj. Po të mos ishte për bashkimin tonë, po të mos ishte për bashkimin tuaj, sot Shqipëria do të bëhej gati të vendoste duvakun e vendeve aziatike që i nënshtrohet uzurpatorëve. Këta sheh Edi Rama dhe frymëzohet, këta sheh dhe e pandeh popullin shqiptar për një popull që mund ta nënshtrojë, gënjejë dhe përçajë. Rezistenca jonë ka dhënë mesazh të rëndësishëm, Edi Rama i ke bërë hesapet pa popullin. Largimi i tij, vetëm çështje kohe”, u shpreh Lulzim Basha./Opinion.al
