Demokratët paralajmërojnë përshkallëzim të aksionit parlamentar duke kërkuar rikthimin e seancës plenare të pyetjeve për ministrat dhe kryeministrin. Vendimi i Grupit Parlamentar vjen pas tensioneve që shoqëruan seancën e së enjtes dhe përjashtimit të Lulzim Bashës për thyerje të rregullores së Kuvendit.
“Ne do të intensifikojmë aktivitetin tonë parlamentar, duke rikthyer një praktikë konform rregullores që është praktika e seancës së pyetjeve për të vendosur Edi Ramën dhe ministrat e tij para përgjegjësisë”.
Të enjten demokratët do t’i rikthehen debatit për zgjedhjet, përpara ngritjes së Komisionit të Reformës Elektorale.
“Pa rivendosur institucionin e zgjedhjeve shqiptarët kurrë nuk do të kenë një qeveri që të mendojë për ta. Edi Ramën e sollën në pushtet bandat, krimi, droga dhe paratë e drogës. Themeli i kësaj të keqeje është një qeveri që nuk vjen nga zgjedhjet, pa rregulluar këtë themel asgjë tjetër nuk do të shkojë mirë në shtëpinë tonë të përbashkët që është Shqipëria”.
Teksa Kryeministri Rama paralajmëroi hapjen për publikun çdo fundjavë të Parkut të Pallatit të Brigadave, Basha e akuzoi si i vetmi përgjegjës për gjendjen e alarmante të krimit, që sipas tij, po mban peng hapjen e negociatave me Bashkimin Europian.
Tv Klan
