Kryesia e Partisë Demokratike ka votuar unanimisht propozimin e kryetarit Lulzim Basha për djegien e mandateve. Kryedemokrati po ashtu në një deklaratë për mediat, ai ka dhënë dhe një mesazh për reagimin e ambasadës amerikane.
“Unë nuk komentoj kurrë asnjë deklaratë të përfaqësive të huaja në Tiranë. Por dua tja u them fare qartë, se për PD dhe për mua nuk ka frymëzim më të madh se sa SHBA dhe demokracia amerikane”, deklaroi Basha.
Sipas tij djegia e mandateve nuk është qëllim në vetevete, por mundësia e fundit që i është lënë opozitës për të arritur një qëllim madhor. “Duam që të heqim këtë qeveri të krimit dhe t’ju japim shqiptarëve një qeveri të njerëzve. Nuk kërkojmë të marrim mandate nga krimi i organizuar”, theksoi Basha.
Ambasada amerikane në Tiranë reagoi sot me tone të forta ndaj vendimit të paprecedent të opozitës për të hequr dorë nga mandatet parlamentare të deputetëve të saj. “Një demokraci e shëndetshme kërkon një opozitë që funksionon në mënyrë konstruktive brenda institucioneve kushtetuese. Kërcënimet nga Partia Demokratike, Lëvizja Socialiste për Integrim dhe parti të tjera opozitare për të braktisur mandatet e tyre në parlament minojnë parimet bazë të demokracisë dhe sabotojnë përparimin e rëndësishëm që Shqipëria ka arritur në zbatimin e ligjit dhe qeverisjen e përgjegjshme”, thekson deklarata.
Në qëndrimin e saj ambasada gjithashtu shprehet se: “Shtetet e Bashkuara iu bëjnë thirrje të gjithë deputetëve të ngrihen mbi sherret politike, të refuzojnë thirrjet për të braktisur mandatet e tyre dhe të mbrojnë idealet dhe parimet që janë me rëndësi thelbësore për çdo demokraci të fortë. Nëse dështoni të bëni punën tuaj, do të zhgënjeni njerëzit të cilëve keni privilegjin t’u shërbeni”. /G.F Opinion.al
