Kryetari i Partisë Demokratike Lulzim Basha, ka mbledhur sot Kolegjin e Kryetarëve ku po diskutohet në lidhje me situatën e post tërmetit si dhe për krizën politike në vend.
Ndërkohë, janë zbardhur dhe disa nga porositë e kreut të PD. Mësohet se Basha ka kërkuar që të jenë çdo ditë afër qytetarëve dhe sidomos atyre të prekur nga tërmeti.
Basha ka kërkuar gjithashtu ngritjen e grupeve të punës për të identifikuar familjet e prekura që nuk kanë marrë ende asnjë ndihmë dhe janë të pastreha. Sipas tij, PD duhet të bëhet zëri i qytetarëve, në mënyrë që ata të dëgjohen dhe t’u vihet në ndihmë.
“Duhet te jemi çdo ditë afër qytetareve, duhet të jemi gjithnjë pranë tyre. Në degët e prekura nga tërmeti duhen ngritur menjëherë grupe pune që të identifikojnë çdo familje të prekur nga tërmeti. Këto grupe pune të identifikojnë ato familje që nuk i është ofruar asnjë ndihmë, që gjenden pa strehë. Të evidentohen familjet që nuk kanë vlerësim për banesat e tyre, apo kanë vlerësime kontradiktore, që jetojnë në objekte të shpallura të pabanueshme se nuk kanë ku të strehohen. Nuk mund të rrezikohet më jeta e qytetarëve. Është kriminale që banorët pas një muaji nga tërmeti s’kanë marrë asnjë ndihmë apo janë diskriminuar se nuk kanë votuar më 30 qershor apo për shkak të bindjeve partiake”, ka thënë Basha.
Po ashtu, bëhet me dije se Basha ka thënë se grupet e eksperteve janë në fund të hartimit të projekt ligjeve për ndryshimet e reformës zgjedhore.
“Në fillim të janarit do të jenë gati. Do të bëhet prezantim publik dhe njeherë do ti behën të ditura të gjitha strukturave të PD dhe qytetarëve. Pas prezantimit, këto propozime do t’i nënshtrohen një konsultimi të gjerë për të marrë mendimin e anëtarësisë dhe qytetarëve edhe përsa i përket aspekteve të tjera të reformës siç është sistemi zgjedhor”, tha Basha./ Opinion.al
