Rama dhe Basha po replikojnë në parlament, që nisi për taksën e Rrugës së Kombit e vazhdoi me ndikimin rus në vend. “Mos e thirr fatin tënd para kohe se jo vetem nuk je konsultuar me PD, por as me mua se do të kisha thënë se po i humbet zgjedhjet dhe s’ke nevojë të marrësh para nga rusët”, iu drejtua Rama-Bashës.
Në replikë, Basha u përgjigj: “Ti nuk je shoku im, se i ke zgjedhur shokët e tu, janë Shullazi, Habilajt, Armand Prenga, etj. E dyta sa për oligarkët rus jam gati të bëhet hetim parlamentar sepse PD s’ka marrë asnje lek nga Rusia.
Për herë të parë ai deklaroi se një biznesmen shqiptaro-amerikan është kërcënuar nga një ministër i kabinetit qeveritar, por nuk ia përmendi emrin. Opinion.al mësoi se bëhet fjalë për ministrin Damian Gjiknuri.
“Unë po të them që në qoftë se Prokuroria nuk do të ishte e kontrolluar nga ty, sot do të duhej të ishte hapur hetimi për një ministër tënd që krekoset aty, i cili ka nisur banditë në emër të Juremeksit dhe Rusisë një investitori shqiptaro-amerikan. Dhe unë i bëj thirrje prokurorisë të nisë hetimin, se kjo është e poseduar edhe në Ambasadë Amerikane”.
Po kështu, Basha i përmendi Ramës edhe bankën ku punon bashkëshortja e tij. “Të bëj thirrje të bësh transparencën për Abi Bank ku shërben bashkëshortja jote po blen banka pa fund në Tiranë, ndërkohë që fondet kryesore vijnë nga fondi rus me 540 milionë euro privatizime në Rusi, drejtpërdrejtë nga Kremlini”.
Rama në replikën e radhës me Bashën, tha se Abi Bank është investimi më i madh amerikan në Shqipëri”.
/Opinion.al
