Kryetari i Partisë Demokratike, Lulzim Basha gjatë takimit me strukturat në Kuçovë dhe në Urën Vajgurore tha se krimi dhe korrupsioni janë shkaktarët kryesorë të situatës në të cilën ndodhet vendi sot. “Vetëm këtë vit 45 milionë dollarë fonde publike u ndanë për 11-shen e miqve të vet, bashkë me shpenzimet për orendi, shpenzime luksi, karburant, makina shkon në 234 milionë dollarë. Kjo shifër është e barabartë me ndihmën ekonomike për një vit për 200 mijë familje. Në qoftë se këto para do të shpenzoheshin për subvencione për bujqësinë çdo fermer shqiptar do të merrte 500 mijë lekë”, u shpreh ai.
Pushteti i Edi Ramës, tha Basha, është përqendruar në duart e një grushti kriminelësh dhe të korruptuarish që ndajnë paratë me të dhe kërkojnë me çdo çmim të mbajnë pushtetin, ndërsa varfëria dhe mjerimi për qytetarët shtohet.
“Edi Rama ka ndërtuar një kazermë tiranike të krimit dhe të korrupsionit së bashku me kriminelët më në zë të Shqipërisë. Shikoni si i ka ndarë punët: buxhetin për vete, drogën me kriminelët me të cilët ka ardhur në pushtet. Çfarë mbetet për popullin?! Varfëria, emigracioni, burgu po nuk pagove dot faturën apo do të lidhin sytë në mëngjes dhe do të çojnë tek arat e drogës dhe do ti lidhim prapë në darkë e do të kthejmë në shtëpi, si argat, si skllav i drogës”, u shpreh lideri demokrat.
Sipas tij, vendi s’ka nevojë thjesht një rotacion, por duhet një ndryshim epokal në qendër të së cilit të jetë fuqizimi i qytetarit shqiptar dhe kufizimi i pushtetit të ardhshëm sipas një modeli europian. /Opinion.al
