Një nga masat e ndërmarra në kohën e krizës së koronavirusit është dhe ajo e shtyerjes së shlyerjes së kësteve të kredisë për individët dhe bizneset.
Kryeministri Rama dhe Guvernatori i Bankës së Shqipërisë, Gent Sejko frimosën dy ditë më parë marrëeshjen që garanton shtyrje e pagesës së kësteve deri në qershor dhe përjashtimin nga penalitetet për vonesën.
Për këtë arsye bankat kanë nisur të njoftojnë klientët e tyre për mënyrën e aplikimit për shtyrjen e pagesës së kësteve të kredive.
Në njoftimin e bankave thuhet se, “çdo klient i cili pretendon që në situatën COVID-19 nuk ka aftësi pagimi dhe kërkon të shtyjë pagimin e kësteve duhet që, në mënyrë elektronike apo shkresë zyrtare të dorëzojë kërkesën për shtyrje kësti duke e shoqëruar me arsyet e mospagimit të kësteve”.
Kërkesa mund të dërgohet elektronikisht me email, me sms ose me shkresë zyrtare pranë degës ku kanë marrëdhënie klientët.
“Banka thotë se do të shqyrtojë çdo kërkesë të ardhur nga klientët dhe pas një analize do të marrë vendimin e saj brenda 3 ditë pune. Përgjigjja më pas do t’iu komunikohet klientëve në formë zyrtare. Nuk do të ketë nevojë për amendime apo shtojca kontratash dhe se do të zerojë penalitetet për vonesat gjatë periudhës së përcaktuar për të gjithë klientët e portofolit të kredisë, ndërkohë që interesat dhe principali do të vazhdojnë të gjenerohen normalisht”, thuhet në njoftimin e bankave. /Opinion.al
