Banka e Shqipërisë raporton se kushtet për dhënie kredie te biznesi janë shtrënguar, kurse për qytetarët pati lehtësi. Rezultatet e vrojtimit vënë në dukje se kredia është shtrënguar më shumë për biznesin e madh, ndërsa për ndërmarrjet e vogla dhe të mesme ka pasur prirje lehtësuese.
Për qytetarët standardet e kreditimit janë lehtësuar si për kredinë konsumatore, ashtu edhe për kredinë për blerje shtëpie, por lehtësimi më i madh ka qenë te kreditë konsumatore.
Bankat shprehen se lehtësimi i kushteve të kredisë për qytetarët erdhi si shkak i ngushtimit të marzhit mesatar për kreditë, rritja e raportit të kërkuar të këstit ndaj të ardhurave, zvogëlimit të komisioneve dhe rritja e madhë- sisë së kredisë. Kërkesa për kredi në tremujorin e parë të vitit 2017 u raportua në rritje si për bizneset, ashtu edhe për individët.
Rritja e kërkesës së individëve është regjistruar kryesisht për kredi konsumatore, ndërsa ajo për blerje banese ka shfaqur tkurrje. Për biznesin, sipas Bankës së Shqipërisë, faktorët kryesorë që ndikuan në shtrëngimin e standardeve të bankave për kredinë dhënë bizneseve vijojnë të mbeten faktorët që lidhen me problemet specifike të sektorit, kreditë me probleme, perceptimi i bankave mbi situatën makroekonomike dhe mjaftueshmëria e kapitalit.
Nga ana tjetër, konkurrenca në tregun bankar dhe niveli i likuiditetit të bankave janë faktorë që kanë ndikuar në kahun lehtësues të standardeve të kredisë dhënë individëve. Politika shtrënguese e bankave ndaj kredive për biznese u zbatua kryesisht nëpërmjet rritjes së kërkesave për kolateral dhe disi më pak nga kufizimi i madhësisë së kredisë.
Për sa i takon kërkesës së bizneseve, ajo ka shfaqur një zgjerim të lehtë, kryesisht nga ndërmarrjet e vogla dhe të mesme. Bankat presin shtrëngim të standardeve të kreditimit për bizneset, ndërsa për individët mendohet të ketë lehtësim në tremujorin e dytë të vitit 2017.
Për bizneset, shtrëngimi mendohet të jetë në segmentin e ndërmarrjeve të mëdha, ndërsa për individët, pritet që lehtësimi të vijë te kredia për konsum. Kërkesa për kredi parashikohet në rritje, si për bizneset, ashtu edhe për individët.
Burimi: Panorama
