Teksa pritet që Gjykata të japë vendimin në lidhje me çështjen ‘Babale’ ku ndër të akuzuarit për shpifje është edhe ish-deputeti i PD, Ervin Salianji, ky i fundit ka dalë në një deklaratë për mediat dhe ka akuzuar kryeministri Rama ka manipuluar procesin.
Salianji ka deklaruar se ky proces është manipuluar dhe me urdhër të kryeministrit Rama janë hequr prej dosjes përgjimet zyrtare që implikojnë në mënyrë flagrante dëshmitarin e saj të rremë dhe drejtues të lartë të policisë.
“Përgjimet zyrtare të prokurorisë, të patranskriptuara prej saj, në shkelje flagrante të ligjit, faktojnë 2 të vërteta:
1-vënien e qeverisë në shërbim të krimit dhe të mbulimit të tij për të shpëtuar qeverinë e Ramës
2-sajimin e dëshmitarit të rremë.
Gjithçka kemi thënë që nga zbulimi i skandalit, provohet i vërtetë. Përgjimi zyrtar me drejtorin e policisë së Fierit, fakton se policia është vënë në shërbim të qëllimit politik të qeverisë për të fshehur të vërtetën e vëllait të ministrit të brendshëm dhe për të akuzuar opozitën.”, tha Salianji.
Ai zbuloi se në dokumentat zyrtarë rezulton se “Agron Xhafaj dhe Babalja ishin në survejim nga Shërbimi sekret dhe nga prokuroria për transportin e një sasie marramendëse droge.”
“Përgjimet tregojnë se si prokurori i shkarkuar nga vetingu, flet me dëshmitarin e rremë të qeverisë dhe e pret sa herë që ai ka nevojë, jashtë çdo procedure të lejueshme.
Faktet në dosje tregojnë, më së paku, shpërdorimin e detyrës nga ministri i brendshëm, drejtuesit e policisë, implikim të numrit dy të partisë në pushtet në një çështje që përfshin në krim gjithë shtetin për sajimin e një dëshmitari të rremë kundër opozitës. Për fat të keq, asgjë nga këto nuk është bërë pjesë e hetimit. Pjesë e hetimit është bërë vetëm opozita dhe media, me një akuzë qesharake, të pabazuar në prova, të sajuar politikisht.”, deklaroi ish-deputeti i PD. /Opinion.al
